URassie Erasmus ulibhengezile iqela lezitsibabhokhwe elizakudlala ngoMgqibelo.
Libhengeziwe iqela loMzantsi Afrika lombhoxo nelizakuqubisana neqela laseWales kumabala iTwickenum, eLondon, ngoMgqibelo umhla wamashumi amabini anesibini (22) kulenyanga ngentsimbi yesithathu (15h00) emva kwemini ngokwexesha loMzantsi Afrika.
URassie Erasmus uchonge abadlali abangamashumi amabini anesithathu (23) abazakuthi badlale ngoMgqibelo. Umqeqeshi ukhethe nomdlali ozakuba yinkokheli nanjengoko inkokheli yabo ingazokuba khona uSiya Kolisi.
UPieter Steph du Toit ukhethwe njengomdlali ozakukhokela iqela lamabhokobhoko kulempelaveki.
Ababadlali bafakwe kweliqela ngoyinkokheli yalo obambeleyo uPieter Steph du Toit nodlala njengeFlanker, bane (4) abadlali abatsha nabaqalayo abathe bafakwa kweliqela.
Amabhokobhoko ayaqala ukudlala oko bagqibela ngethuba bephumelela indebe yehlabathi yombhoxo kunyaka ophelileyo ngenyanga yeDwarha ngethuba bebetha iiAll Blacks kumagqibela kankqoyi.
Kuzakube ilityeli lesibini (2) uDu Toit ekhokela eliqela, wayelikhokele ngethuba lomdlalo wovavanyo neWales eWashington ngonyaka ka2018 ngethuba bephulukana nalomdlalo ngamanqaku angamashumi amabini anesibini kumanqaku anamashumi amabini (22-20).
Kubadlali abane (4) abatsha kweliqela, ababini (2) ngabe Lions, Jordan Hendrikse odlala njengeFlyhalf noEdwill van der Merwe odlala ephikweni nabazakuwuqala umdlalo, ibe ngabadlali ababini (2) beStomers uBen-Jason Dixon odlala njengeLock noSacha Feinburg-Mngomezulu odlala njenge-Utility Back nabaza kuwuqala estulweni njengamalalela omdlalo.
Izitsibabhokhwe zamkele umdlali wazo onamava uMalcolm Marx nowathi wafumana ukonzakala kwindebe yehlabathi eFrance kunyaka ophelileyo.
Odlala njengeProp uVincent Koch uzakube egqiba amashumi amahlanu (50) emidlalo kwiqela lesizwe loMzantsi ngoMgqibelo. Eliqela liquka abadlali abane (4) abaphumelele indebe yehlabathi uBongi Mbonambi, uGrant Williams, uFrans Malherbe noDamian de Allende.
Naba abadlali abangamashumi amabini anesithathu (23) abazakudlala neWales bamabhokobhoko, kwindawo yeshumi elinesihlanu (15) nguAphelele Fassie, kweyeshumi elinesine (14) nguEdwill van der Merwe, kwindawo yeshumi elinesithathu (13) ibe nguJesse Kriel, kweyeshumi elinesibini (12) ibe nguAndre Esteahuizen, kwindawo yeshumi elinanye (11) nguMakazole Mapimpi, kweyeshumi (10) ibe nguJordan Hendrikse, kwindawo yethoba (9) nguFaf de Klerk, kweyesibhozo (8) nguEvan Roos, kweyesixhenxe (7) ngoyinkokheli uPieter Steph du Toit, kwisithandathu (6) nguKwagga Smith, kweyesihlanu (5) nguFrance Mostert, kweyesine (4) ibe ngu-Eben Etzebeth, kweyesithathu (3) nguVincent Koch, kweyesibini (2) nguMacolm Marx ibe nguNche kwindawo yokuqala (1).
Amalalela nguBongi Mbonambi, uNtuthuko Mchunu, uFrans Malherbe, uSalmaan Moerat, uBen Jason-Dixon, uGrant Williams, uSach Feinburg-Mngomezulu noDamian de Allende.
By Siphiwo Boqwana