By Siphiwo Boqwana.
Ibuthe kwanto iAngola ngethuba kubhengezwa abaphumelele iindondo kwiNdebe yeCOSAFA kumdlalo webhola ekhatywayo emva kokuyikhusela ngempumelelo le ndebe, iAngola ibhaxabula iqela leBafana Bafana kumagqibela kankqoyi ngamanqaku amathathu eqandeni (3-0).
IiBlack Antelopes ziyiphumelela isihlandlo sesihlanu (5) le ndebe emva kokuyibamba ngonyaka ka1991, 2001, 2004 nangonyaka ka2024. Kuye kwabhengezwa abadlali abathe bazibalula kuletumente emva komdlalo wamagqibela kankqoyi.
Komnye umdlalo, iqela lebhola ekhatywayo leComoros lingene kwindawo yesithathu (3) emva kokubetha ilizwe laseMadagascar ngenqaku elinye kwiqanda (1-0).
ULaurindo Aurelio uphumelele indondo yeGolden Boot, ukutsho oko ube ngoyena mdlali ufake amanqaku amaninzi kuletumente ngethuba efaka amanqaku asibhozo (8), kwalo mdlali mnye utyunjwe njengomdlali obalaseleyo wolukhuphiswano.
Umgcini zipali weqela lesizwe lase-Angola uAdilson Da Cruz utyunjwe njengoyena nozinti obebalasele kuletumente.