IChippa United ilibhengezile ibala kwakunye nosuku lomdlalo wayo nePirates.
Iqela lebhola ekhatywayo laseMpuma Koloni nelizinze eGqeberha iChippa United lilibhengezile ibala kwakunye nomhla abazakuthi baqubisane ngawo neOrlando Pirates.
La maqela mabini azakudlala kumandulela kamagqibela kankqoyi wendebe yeNedbank, oku kuza emva kokuba lamaqela athelekiswa emva komdlalo wabo neTS Galaxy ngecawa yalempelaveki esiphuma kuyo umhla weshumi elinesine (14) kuTshazimpuzi 2024.
Omabini lamaqela adlala kakuhle kunjalo nje ayaqinisekisa ekufakeni amanqaku ingakumbi iqela laseSoweto ibhakabhaka. IPirates kwimidlalo emibini (2) egqithileyo iwathulule kakuhle amanqaku emnatheni yabe ingahleki nenye kwezihlekisayo.
Amabhakabhaka ashiye iingxwelerha ezimbini (2) ngasemva ngethuba bengcwaba iGolden Arrows kwiDSTV Premiership ngamanqaku asixhenxe kwelinye (7-1), yaphinda yashiya enye ingxwelerha ezikwa ngabamelwane babafana besithende iAmazulu bewabethela kowabo emnambithi ngamanqaku amane kwamabini (4-2) kwindebe yakwaNedbank.
Zona iiChilli Boyz kwimidlalo emibini (2) egqithileyo ingxwelerha zayo yaqala yayiKaizer Chiefs beyibhuqela eMonti ngamabini amanqaku kwiqanda (2-0) kumdlalo weDSTV Premiership. Zaphinda iiChilli Boyz zathatha apho beziyeke khona ngethuba zizibethela kowazo eMpumalanga iiRockets ngamanqaku amabini eqandeni (2-0) kumdlalo wendebe yakwaNedbank.
Kulamaqela mabini iPirates neChippa, iPirates izithembe ngokufaka kakhulu amanqaku emnatheni ibe ivulele nje ukuba kufakwe kuyo kancinci, bona baqinisekisa ngokufaka kakhulu kuneqela abadlala nalo kodwa yona iChippa iqinisekisa ngokuvala amazibuko khona ukuze kungangeni kwanqaku kubo kwelinye icala baqinisekise ngokufaka amanqaku okuphumelela.
IChippa kulemidlalo mibini iyidlalileyo ifake amanqaku amane (4) yona ayavumela nocikicane kwezabo iimpondo. IPirates yona kulemidlalo yayo mibini (2) igqithileyo ifake amanqaku alishumi elinanye (11) kwangena amathathu (3) kubo, nto leyo ebonisa ukuba iyawagalela kakuhle amanqaku kuba ikholelwa ukuba umnatha awugcwali.
Abahlinzeki balomdlalo wendebe yeNedbank wamandulela kamagqibela kankqoyi iChippa ibhengeze ukuba lo mdlalo uzakudlalwa ngomhla wesine (04) kwinyanga kaCanzibe 2024, kwibala iNelson Mandela Bay eGqeberha nalapho uyakuqala ngentsimbi yesithathu emva kwemini ngoMgqibelo ezintsukwini.
Kulamaqela mabini eliphumeleleyo lakuqubisana neliphumeleleyo phakathi kweStellenbosch FC neMamelodi Sundowns kumdlalo wamanqam ozakudlalwa ngomhla wokuqala kwinyanga yeSilimela 2024.
Siphiwo Boqwana.