Kwiveki ezayo iDyunivesiti yaseFort Hare izakube ibambe umsitho wothweso zidanga.
Kulindeleke ukuba esi sikolo sidume kakhulu ngokunika imfundo enomsila kosaziwayo abantsundu ingakumbi abakwezopolitiko sibamba umsithi wothweso zidanga obizwa 2024 Autumn Graduation.
Kwabo babethwese izidanga kuledyunivesiti abaziwayo singabalula abafana nongasekhoyo igqala lomzabalazo nowaba ngoyena mongameli wombutho ukhongolose utsalileyo ukuxhuzula iintambo zolawulo uOliver Reginald Rhorho Tambo, ongasekhoyo nowayesakuba ngumongameli welizwe laseZimbabwe uRobert Mugabe, ongasekhoyo nowaba ngumongameli wokuqala wentando yesininzi kweli loMzantsi Afrika uDr uNelson Rholihlahla Mandela nongasekhoyo nowayeyinkokheli yamakomanisi uChristopher Martin Thembisile Hani nabanye abaninzi.
Eliziko lezifundo ezinomsila lizakwenza imbali kwiveki ezayo nalapho lizakube lithwesa oyena mfundi wakhe wamncinci ngeminyaka kwimbali yelaziko, uOwami Ngqono oneminyaka elishumi elinethoba kuphela ubudala, ikhaya lakhe liseGcuwa apha eMpuma Koloni. Eli gqiyazana lisaze ngobuso elizweni lizakube lithweswa isidanga seBachelor of Agriculture in Economics Degree.
UOwami ufike eDikeni kwaSomgxada eneminyaka nje elishumi elinesithandathu kuphela ubudala. UNgqono ebefunda ibanga lakhe leshumi kwisikolo iLamplaugh nesizinze kwindawo ebizwa ngokuba yiMissionvale, eGcuwa apha eMpuma Koloni.
Lenzwakazi incinci kangaka yathi yafumana ukuphumelela olukwizinga eliphezulu (distinctions) kwizifundo ezintathu, kwiAgricultural Science, iMathematic Literacy kwakunye nesiXhosa. UOwami uqale ukufunda kumabanga aphantsi eneminyaka nje emihlanu kuphela ubudala.
“Oko ndabonwa njengomntana omncinci ohlakaniphileyo ukusukela kumabanga aphantsi ukuzakuthi ga ngoku, ndithandwa zitshomi otitshala nabantwana besikolo,” utshilo uOwami.
“Ndikhulele kwikhaya elifudumeleyo elikhuthazayo phantsi komakhulu notamkhulu nababendifundisa intlonipho nokuba ithuba elivelayo ndilibambe ngezandla zozibini ndingaliyeki,” utyatyadule watsho uNgqono.
“Ndiqale eLamplough ukuba nothando ngezifundo zokulima nalapho ndiye ndakhuthazwa ngutitshala owayendihlohla ezizifundo nowandicebisa ukuba ndiyokuzifundela kwaSomgxada kuba siso esingcono nam ndiyavuma kunjalo ndiyibonile loo nto”.
Lo mfundi ukwavakalise okokuba ukungena edyunivesiti kuye ukusuka kwisikolo sebanga leshumi khange kumnzimele bekulula.
“Ndithe ndifika ndafumana ububele nokwamkeleka kubafundi nakubaphathi kwabalula kakhulu kengoku kuba kwakho nesizalwane sam esasigqibezela apho”, uvakalise oko umfundi ongoyena wayekhe wamncinci nozakuthi athiwe jize ngesidanga somsebenzi wakhe.
UOwami ubulela ebamba ngazo zozibini ngenkxaso athe wayifumana nenkuthazo kubafundisi ntsapho, iitshomi nakusapho lwakhe ingakumbi umama wakhe nobesoloko emkhuthaza ngalo lonke ixesha.
“Umama naye uzakube efumana esakhe isidanga sokuqala kwinyanga ezayo kwidyunivesiti iWalter Sisulu nalapho kudala ezama, utshilo uNgqono ekwavakalisa nokuba ebezamela yena ukuba aqhubele phambili kwizifundo zakhe.
“Iinjongo zam ngoku kukwenza isidanga seemasters ngethemba lokwenza isidanga esibizwa ngokuba yiPhD”, uvale ngelitshoyo umntwana.
UOyami Ngqono kulindeleke ukuba afince iminyaka engamashumi amabini ngenyanga yeSilimela kulonyaka ka2024.
Siphiwo Boqwana