ISebe leMicimbi yaseKhaya kunye nowayesakuba yinkosazana yobuhle uChidimma Adetshina baveze iingxoxo ezingqubanayo kwiNkundla yeSithili yaseKapa ngoMvulo umhla wamashumi amabini (20) kweyeKhala malunga nobuwena bakhe kunye nesimo sakhe sokufudukela kwelinye ilizwe.
ISebe leMicimbi yaseKhaya liphikisane ngelithi uAdetshina ngumntu wangaphandle ongekho mthethweni ongenazo iimpepha zaseMzantsi Afrika kwaye kufuneka ahlale evalelwe ngelixa kuqhubeka iinkqubo zokugxothwa. Liphinda lityhola ngelithi wafumana iipasipoti zaseNigeria yena nomntwana wakhe omncinci ngaphambi kokuba angene eMzantsi Afrika ngeMozambique emva kokufaka isicelo se-visa yaseMzantsi Afrika eLagos.
Iqela lezomthetho lika-Adetshina liwakhanyele amabango esebe, liphikisa ngelithi wazalelwa eMzantsi Afrika, akanabo ubudlelwane obubalulekileyo neNigeria, kwaye akabeki mngcipheko wokubaleka. Abameli bokhuselo bakwathi ubuzwe bakhe bungumxholo womngeni weNkundla ePhakamileyo eyahlukileyo kwaye iSebe leMicimbi yaseKhaya alizange lenze uphando olufanelekileyo ngaphambi kokuba livakalise ukuba amaxwebhu akhe angasebenzi.
Ngexesha leenkqubo, umantyi ukhuthaze omabini amaqela ukuba asombulule le ngxaki ngaphandle kokungenelela kwenkundla. Nangona kunjalo, akukho sivumelwano sifikelelweyo.
Isigwebo sigcinwe kude kube ngumhla weshumi elinesithoba ku-Agasti, apho kulindeleke ukuba inkundla igqibe ukuba uAdetshina makahlale evalelwe na ngelixa iinkqubo zokugxothwa ziqhubeka.