Ummeli womdlali weSupersport uthi kusekutsha ukuba kuthiwe umdlali wamatsatsantsa utyikityile phesheya.
Umphathiswa omtsha wezemidlalo kwilizwe loMzantsi Afrika kurhulumente omtsha wobambiswano uGayton Mckenzie uqinisekise iingxelo zokuba umdlali osaze ngobuso elizweni noneminyaka elishumi elinesibhozo (18) ubudala untingele kwelaphesheya kwezilwandle e-Europe.
Umphathiswa uthethe kumakhasi onxibelelwano esithi elityendyana lidlalela Amatsatsantsa asePitoli liya kwelaseBelgium nalapho liyokudlalela elinye lamaqela angoompondo zihlanjiwe iClub Brugge.
Nangona kunjalo yena ongummeli kaShandre uMike Makaab uvakalise ukuba kusekutsha ukuba kungathwa umdlali lo kaCampbell uzakudlalela eliqela iClub Brugge kuba ingxoxo zisaqhuba. Yena umphathiswa wezemidlalo uthi lomfana uzakudlalela iqela laseBelgium kunjalo nje sele kutyikityiwe.
UShandre Campbell unyuselwe ukuba adlalele amakhwenkwe amakhulu kwiSupersport United kunyaka ophelileyo ngenyanga yeKhala waze wadlala umdlalo wokuqala (1) ngenyanga yeThupha kwakunyaka ophelileyo ngethuba bebetha iqela laseMdubane iRichards Bay ngamanqaku amabini eqandeni (2-0) kumabala iNew Peter Mokaba.
UCampbell udlale imidlalo engamashumi amathathu (30) kweliqela lasePitoli kwisizini esiphuma kuyo. Ukhumbule ukuba uCampbell uye wangomnye waba bechongelwe ukukhethwa ukuba abe ngumdlali obalaseleyo omncinci, inguye nowathi waphumelela uRelebohile Mofokeng wePirates nadlala naye kwiSupersport Ima Akon, nto leyo icacisa indlela ebeyimpumelelo ngayo isizini yakhe eMzantsi kuMatsatsantsa.
IbingeyoClub Brugge kuphela iqela ebelinomdla kuCampbell iFC Midtjylland yaseDenmark neFeyenoord yaseHolland ngamanye amaqela ebenomdla kuye. Iqela iFeyenoord lelinye lamaqela amakhulu kwilizwe laseDutch kwibhola ehlawulelwayo kwelalizwe. Nayo iFC Midtjylland lelinye lamaqela athathelwa phezulu kwilizwe laseDenmark.
Ngokwengxelo kaMckenzie elityendyana lakwaCampbell sele lindulukile labhabhela emajukujukwini ukuya kwelaseBelgium.
By Siphiwo Boqwana