Iyiqale ngempumelelo indebe yehlabathi iWest Indies nekwangaba hlinzeki bebambisene neMelika.
IWest Indies ibethe iPapua New Guinea kumdlalo wokuvula wendebe yehlabathi yeqakamba kwiT20. Lo mdlalo walamaqela mabini (02) ubudlalelwa kumabala iGuyana eWest Indies ngeCawa umhla wesibini (02) kweyeSilimela ukutsho oko phezolo.
Kokwesibini ingena kwindebe yehlabathi iPapua New Guinea, okokuqala yabethwa yomithathu imidlalo yayo yokuqala ngonyaka ka2021.
Ngethuba isengxakini kumdlalo wayo ubungancomeki iWest Indies ibinamashumi alithoba anesixhenxe (97) iphulukene noothinti abahlanu (5), kulapho incedwe ngabadlali bayo ababini (2) uRoston Chase owenze amashumi amane anesibini (42) kwiibhola azingamashumi amabini anesixhenxe (27) nalapho eqhoke amanqina enkomo amane neempondo zenkomo ezimbini ephuma exwaye uphini lakhe.
Omnye umdlali obakhuphe ehlazweni nguAndre Russell noqhoke ishumi elinesihlanu (15) naye ephuma exwaye uphini lakhe. Itsho yakwazi ukuphucula isikoro sayo iWest Indies ngethuba isenza ikhulu elinamashumi amathathu anesixhenxe (137) iphulukene noothinti abahlanu (5) kwiiOvers ezilishumi elinethoba (19).
IWest Indies iyibethe ngothinti abahlanu (5) iPapua New Guinea neye yona yaqhoka ikhulu elinamashumi amathathu anesithandathu (136) iphulukene noothinti abasibhozo (8).
Ukhumbule ukuba phambi kokuba kuqale lendebe yehlabathi iWest Indies ibizilolonga neqela leeProteas loMzantsi Afrika nalapho lizihlaze khona iiProteas ngethuba liyibetha kuyo yomithathu (3) loo midlalo.
By Siphiwo Boqwana