Unobhala-jikelele we-ANC uFikile Mbalula ukholelwa ukuba eli qela liza kuphumelela kwisicelo salo senkundla kwaye liphinde liphumelele ukufumana kwakhona uphawu lo-Mkhonto We Sizwe.
Ethetha kwisikhumbuzo somntu odumileyo owayechasene nocalucalulo uSolomon Kalushi Mahlangu ngoMvulo umhla wesithandathu (6) kuTshazimpunzi, uMbalula uvumile ukuba amajoni oMkhonto We Sizwe asele ekhulile waza wabaqinisekisa ukuba baza kuphumelela kwakhona.
“Sisenkundleni namhlanje, sisalwela uMkhonto We Sizwe kwaye siza kuphumelela maqabane enkundleni kuba uMkhonto We Sizwe luphawu lwe-ANC kwaye ngumkhonto wesizwe owakhulula abantu bethu,” utshilo.
UMkhonto We Sizwe yayiliphiko le-paramilitary le-ANC elasekwa ngo-1961 kwaye lalijolise ekubekeni uxinzelelo kurhulumente wocalucalulo.
Ngenyanga YoMnga ka-1993 ngexesha lokutshintsha ukusuka kurhulumente wocalucalulo ukuya kurhulumente wentando yesininzi, uMkhonto wachithwa.
Kwiminyaka engamashumi amathathu (30) kamva ngenyanga YoMnga ka-2023, owayengumongameli we-ANC uJacob Zuma wabhengeza ukusekwa kweqela le-Umkhonto We Sizwe (MK) elalibhalisele ukukhuphisana kunyulo jikelele luka-2024.
Eli qela, elalineenyanga ezimbalwa lizelwe, laba lelesithathu (3) ngobukhulu ngexesha lonyulo, uninzi lwenkxaso yalo lukwiphondo laKwaZulu-Natal naseRhawutini.
Ngo-2024, i-ANC yaqalisa isicelo kwinkundla ephakamileyo yaseThekwini sokuthintela i-MK Party ekusebenziseni igama kunye nelogo ye-Umkhonto We Sizwe, isithi yayiziimpawu zorhwebo ze-ANC kwaye ityala lalijoliswe ekukhuseleni ilifa leqela.
Nangona kunjalo, isicelo sachithwa.
Kusenjalo ngenyanga yeNkanga kunyaka ophelileyo i-ANC yafaka isibheno kwiNkundla ePhakamileyo yeziBheno, isithi inkundla ephakamileyo yaseThekwini yenze impazamo kwisigqibo sayo.