By Siphiwo Boqwana.
Kule mpelaveki siphuma kuyo, kubhengezwe iqela lebhola ekhatywayo laseMzantsi Afrika lamagqala elizakuthi lithabathe inxaxheba kwitumente yamaqela ebhola ekhatywayo yamazwe amane (4) aseAfrika ezakuthi iqhutyelwe kwilizwe laseBotswana. Mane amaqela azakuthi aqubisane apho, yiZimbabwe, iNamibia, abahlinzeki iBotswana kwakunye noMzantsi Afrika.
Le tumente neyaziwa njengeClash of the Legends izakube idlalwa ngomhla wamashumi amabini ananye (21) kule imiyo inyanga.
Le tumente yebhola ekhatywayo yamazwe amane aseAfrika izakuqhutyelwa kumabala iObert Itani Chulume kwilizwe laseBotswana.
Izakube ilityeli lesithathu letumente yamagqala ebhola ekhatywayo iqhubeka. Iqela lamagqala oMzantsi Afrika lizakudlala kumdlalo wokuqala apho bazakuqubisana neqela lesizwe lebhola ekhatywayo iZimbabwe ngentsimbi yeshumi elinanye (11h00) ngentlazane kumdlalo wokuqala wamandulela kamagqibela kankqoyi.
Umdlalo wesibini wamandulela kamagqibela kankqoyi, abahlinzeki iBotswana izakube ithathana neNamibia.
Amaqela amabini athe aphumelela kumandulela kamagqibela kankqoyi azakudlana iintsimbi kwangalemini inye ngentsimbi yesithandathu (18h00) malanga kumagqibela kankqoyi.
Bangamashumi amabini (20) abadlali abachongelwe letumente, abagcini zipali nguMoeneeb Joseph noItumeleng Khune.
Ngasemva nguTshepo Malisela, uCyril Nzama, uLucky Lekgwathi, uHappy Jele, uMorgan Gould, uDerrick Spencer, uMatthew Booth noSiboniso Gaxa.
Esiswini nguSimphiwe Tshabalala, uStanton Frederick, uRenilwe Letsolonyane, uLebohang Mokoena, uDikgang Mabalane, uKatlego Mashego noDillon Shepard.
Iifolosi nguSiyabonga Nomvethe, uThuso Phala noJosta Dladla.