IQela lebhola ekhatywayo leSizwe laBafana abangaphantsi kweminyaka engamashumi amabini (U/20) ubudala lindulukile ukuya kuthabatha inxaxheba kumsitho weNdebe yeCOSAFA nebanjelwe kwilizwe laseMozambique.
Eli qela likhokelwa nguRaymond Mdaka nongumqeqeshi walo, alikwazanga ukufumana nokuhamba nabanye abadlali ababalulekileyo. nabafana noMfundo Vikakazi oneminyaka elishumi elinesibhozo (18) ubudala nongumdlali weKaizer Chiefs, uSiviwe Nkwali nodlala ngasemva weqela iCape Town Spurs kwakunye nomdlali weMamelodi Sundowns uAsekho Tiwani osanda kutyikitywa naye ekulindeleke abekhona kweliqela nelidlala neChiefs ngomso.
Eliqela loMzantsi lizakuqubisana neMalawi kumdlalo wokuqala (1) namhlanje uLwesihlanu ongumhla wamashumi amabini anesixhenxe (27) kweyoMsintsi.
Amajita ayakulandelisa ngomdlalo neLesotho ngeCawa umhla wamashumi amabini anethoba (29) kwakule imiyo inyango yoMsintsi, umdlalo wesithathu bathathane neComoros ngoLwesibini umhla wamashumi amathathu ananye (31) xa iphelayo siyivala siyigqibelisa lenyanga yoMsintsi kulonyaka ka2024.
Ukungabikho kukaVilakazi nozakubakho kumdlalo weqela lakhe leChiefs xa idlala neSundowns ngoMgqibelo kuzakwenza ukuba uMdaka axhomekeke kuShandre Campbell odlala ecabangeni ekhohlo nosanda kutyikitya neqela labatsha kwiClub Brugge eBelgium iNXT noSiyabonga Mabena odlala njengefolosi weSundowns.
UMzantsi Afrika unembali kuletumente nanjengoko uyiphumelele amatyeli asibhozo kunjalo nje kulonyaka kubaluleke nangakumbi kuba kaloku ikwalithuba lokuzibekela indawo kwindebe iAFCON kunyaka ozayo ka2025.
UMzantsi ukwazile ukuzibekela indawo kuletumente amatyeli asibhozo yaphuma kwindawo yesibini ifumana isilivere ngonyaka ka1997 yaze yangena kwindawo yesithathu ngo2019 kwiAFCON. Bajongene nomnqantsa kolu luhlu bakulo nalapho bedityaniswe neMalawi, iLesotho neComoros. Kuthathwa iqela lokuqala kwigroup nganye kwakunye neligqibe linamanqaku angcono kwindawo yesibini kunamanye akwindawo yesibini kuluhlu ngalunye ukuze baye kumandulela kamagqibela kankqoyi.
Inkqubela phambili esinokuyikhankanya kwiqela laMajita kulendebe yeCOSAFA kukungena kumagqibela kankqoyi ngonyaka ka2016, ukuyiphumelela lendebe iminyaka ilandelelana ngo2017 nango2018 nokuphuma kwindawo yesithathu ngonyaka ka2022.
Make sijonge indlela abaqhube ngayo kuleminyaka ingamashumi amabini anesihlanu idlulileyo, ngonyaka ka1999 iphume ikwindawo yesibini, ngonyaka ka2000 yayiphumelela, yakwindawo yesine ngonyaka ka2001, ngo2002 nango2003 yahlala kwindawo yesithathu yaza yayiphumelela ngo2004 ngo2005 yakwindawo yesine.
Ngo2006 iye yayiphumelela ngo2007 yakwindawo yesibini yaze yayiphumelela iminyaka emibini ilandelelana ngo2008 no2009, ngo2010 nango2011 baphume kwasekuqaleni kuluhlu ebebekulo baze bakwindawo yesibini ngo2012, ngo2013 bayiphumelela.
Baphume kwindawo yesibini ngo2016 baze bayiphumelela iminyaka emibini ilandelelana bengaqali ukuyenza loo nto ngo2017 nango2018, baba kwindawo yesibini ngo2019 baze bakwindawo yesithathu ngo2022 ukugqibela kwabo kuletumente.
By Siphiwo Boqwana