Umbhoxo weeSevens wophule irekhodi ngabalandeli, eParis.
Namhlanje umhla wamashumi amabini anesine (24) kule yeKhala, iqela lombhoxo iiSevens zoMzantsi Afrika zizakube zivula umdlalo wazo wokuqala (1) kwi-Olimpiki, eFrance.
Eli qela lizakuqubisana ne-Ireland kumabala iStade de France nelithwala abantu abangamashumi amathandathu namawaka alithoba. Itumente yamadoda izakudlalwa ngomhla wamashumi amabini anesine (24), umhla wamashumi amabini anesihlanu (25) nangomhla wamashumi amabini anesixhenxe (27).
Amanina ombhoxo kwiiSevens wona adlala ngomhla wamashumi amabini anesibhozo ukuya kutsho ngomhla wamashumi amathathu (28-30) kule yeKhala inyanga. Amagqibela kankqoyi wendebe yeeSevens azakudlala ngomhla wamashumi amabini anesixhenxe (27) kunjalo nje izakube ingumdlalo wokuqala (1) wegolide kwezi-olimpiki zalonyaka.
Itumente yombhoxo yeeSevens izakudlala eParis kushiyeke nje iintsuku ezimbini (2) uvulwe umsitho walemidlalo ye-Olimpiki.
IAustralia ivula neSamoa kumadoda ombhoxo kwiiSevens, abahlinzeki iFrance ithathana neUSA ize iinjinga ze-olimpiki iFiji iqubisane neqela eliqalayo iUruguay.
Itumente yombhoxo yamanina yona iqala ngomhla wamashumi amabini anesibhozo (28) kweyeKhala ukutsho oko ngeCawa esiya kuyo. Eyamagqiyazana itumente izakuvulwa yi-Ireland iqubisana neGreat Britain, zona injinga kumanina kwi-olimpiki iqela leNew Zealand likhusela kubaceli mngeni iChina eStade de France nezakube izele ime ngeembambo kuba sele ethengiwe amatikiti wabantu abangamashumi amathandathu namawaka alithoba (69 000).
Eli bala iStade de France kuzakudlalelwa kulo umbhoxo lilo ekwakudlalelwa amagqibela kankqoyi wendebe yehlabathi yombhoxo kunyaka ophelileyo.
Ukhumbule ukuba umbhoxo weeSevens uqale okokuqala ezimbhalini kwi-olimpiki eRio ngonyaka ka-2016, yaphinda ngexesha leCOVID eTokyo ngo-2020 ngoku kokwesithathu (3) idlalwa eParis nezakudlalelwa phambi kwabalandeli abophule irekhodi ngokuphuma ngobuninzi okuthenga amatikiti.
Umbhoxo weeSevens ngowona ubonakala ufunwa ngamehlo abomvu kuba xakungoku nje 550 000 yabalandeli abathenge amatikiti kumbhoxo kwezi-olimpiki.
By Siphiwo Boqwana