By Anita Qubula.
Amapolisa aseRhawutini abhaqe indawo yokwenza iziyobisi enamachiza kunye noomatshini bokulungisa abaxabisa imali eqikelelwa kumashumi asibhozo ezigidi zeerandi (R80 million) ngoLwesine.
Isithethi samapolisa uLieutenant Colonel Mavela Masondo uthi bebejonge kwaye bebeke esweni izenzo ezirhanelekayo kwisiza eDouglasdale kwaye baphumeza nencwadi egunyazisa ukugqogqa. Uthi imipu emibini engenampepha-mvume, iimbumbulu zodidi oluphezulu kunye nemipu eyikopi nazo zathinjwa ngelixa kubanjwe abantu ababini bamazwe angaphandle.
Abarhanelwa babanjiweyo kwaye bazakuvela phambi kweNkundla kaMantyi ngexesha elifanelekileyo bejongene namatyala aquka ukwenziwa kweziyobisi, ukuba nemipu ngaphandle kwempepha-mvume, nokuba nembumbulu.
Amapolisa aseRhawutini abhaqe iilebhu zeziyobisi ezingaphaya kweshumi (10) kwezi nyanga zintlanu (5) zidlulileyo.
UMkomishinala wePhondo uLieutenant General Tommy Mthombeni uliqhwabele izandla iqela elifumanise indawo yokusebenzela iziyobisi. Uthe, obu bubungqina banele bokuba bangenelele ekuchongeni nasekuchitheni iilebhu zeziyobisi kwiphondo, ndiyazingca ngamalungu amapolisa athe asebenza ngenkuthalo ekuchongeni nasekuvale amaziko akhoyo ajongene neziyobisi kwiphondo.