By Siphiwo Boqwana.
Iqela lebhola ekhatywayo laKwaZulu Natal iAmazulu sele ilungiselela isizini ezayo, eli qela lityikitye omnye unyaka ukongeza kwisivumelwano salo uRichard Ofori ozakuthi ahlale kwiAmazulu kude kube yinyanga yeSilimela kunyaka ozayo ka2026.
Usuthu lungenile kumaqela asibhozo (8) kwiPSL kule sizini nto leyo ethetha ukuba eli qela lizakudlala kukhuphiswano leMTN8 kwisizini ezayo.
Eli qela lebhola ekhatywayo liqeqeshwa ngowaye sakudlalela nowayesakuba kwangumqeqeshi weKaizer Chiefs uArthur Zwane, kulindeleke ukuba lityikitye abadlali abanamava nabasaze ngobuso elizweni kumalungiselelo abo esizini.
Amazulu akwiphulo lokutyikitya abadlali baphambili kunjalo nje ingxelo zidiza ukuba sele bebabonile, bebazi abadlali ababajongileyo, kukwalindeleke ukuba abo badlali batyikitywe phambi kwenyanga yeKhala xa bezakube bezilolongela isizini ezayo.
Usuthu olumabhaswa nkone lifuna ukuba sele luqinisekile ngeqela labo labadlali phambi kokuba bathabathe inxaxheba kwiMTN8, elukhuphiswano lokuvula isizini.