Abadlali abafana noMbonambi, uSacha nodu Toit baphunyuziwe nguRassie wabiza uLibbok eArgentina.
Kwiqela labadlali abangamashumi amabini anesibhozo abakhethwe ngumqeqeshi wezitsibabhokhwe, abekho abadlali ababini nabebekade beyinxalenye yeliqela, abo nguSacha Feinberg-Mngomezulu noPieter Stegph du Toit. Amabhokobhoko alungiselela umdlalo wawo neqela leePumas zaseArgentina nabazakuthi badlale imidlalo emibini eArgentina nalapha eMzantsi.
ISpringboks zihleli kwindawo yokuqala kumanqwanqwa ehlabathi nalapha kuluhlu lalemidlalo yeRugby Championships ithe ngcu kwindawo yokuqala.
UMzantsi awukabethwa kulendebe, babethe iAll Blacks ne-Australia kabini iqela ngalinye. Lo mdlalo uzakudlalelwa eSantiago del Estero, eArgentina.
UPieter Steph du Toit noSacha Feinberg-Mngomezulu baphunyuziwe bona abayi eArgentina. Ukuphunyuzwa kukaSacha kunika ithuba lokubuya kweflyhalf esakhulayo uMannie Libbok nofakwe noHandre Pollard.
Inkokheli yezitsibabhokhwe uSiyamthanda Kolisi ufakiwe kweliqela nangona ebezakufumana utyando empumlweni kodwa walumisa kuba efuna ukudlala neNew Zealand.
Abanye abadlali abanikwe ikhefu nguBongi Mbonambi oyiHooker, uFrans Malherbe oyiProp, uCheslin Kolbe oyiWing, Damian de Allende oyiCentre, noWillie le Roux oyiFullback.
Umdlalo wesibini phakathi kweeBoks neePumas uzakudlalelwa apha ekhaya kwimpelaveki yasemva kwalomdlalo wasekuhambeni.
Yile midlalo mibini eshiyekileyo ukuba izitsibabhokhwe ziyiphakamisele phezulu lendebe yeRugby Championships neyagqibela ukuyibamba ngonyaka ka-2019.
Nali iqela labadlali bamabhokobhoko elizakukhenketha kwilizwe laseArgentina kulempela veki siya kuyo, kwiiProps nguThomas du Toit odlalela iBath, nguVicent Koch weSharks, uOx Nche weSharks noGerhard Steenkamp weBulls.
IiHookers nguJohan Grobbelaar weBulls noMalcolm Marx weKuborta Spears.
KwiLocks nguEben Etzeberg weSharks, uNicholaas Janse van Ransberg weMontpelier, omnye nguSalmaan Moerat weStomers noJohan Nortje weBulls.
KwiLoose forwards nguBen-Jason Dixon weStomers, ibe nguElrigh Louw weBulls, uSiyamthanda Kolisi weSharks, uMarco van Staden weBulls, uJasper Wiese weUyarasu D-Rocks noKwagga Smith we weShizuoka Blue Revs.
KwiUtility forwards nguJan-Hendrik Wessels weBulls
IiziCrum-halves nguCobus Reinach weMontpelier, uGrant Williams weSharks noJaden Hendrikse weSharks.
KwiFlyhalves nguHandre Pollard weLeicester Tigers noMannie Libbok weStomers.
KwiUtility-back nguCanan Moodie weBulls
Kwi-Centres nguJesse Kriel weCanon Eagles noLukhanyo Am weSharks.
Kwi-Outside backs nguMakazole Mapimpi weSharks, uKuit-Lee Arendse weBulls noAphelele Fassie weSharks.
IArgentina ibhaxabule iWallabies kwimpelaveki esiphuma kuyo ngamanqaku angamashumi amathandathu anesixhenxe kumashumi amabini anesixhenxe (67-27) ngelixesha iiBoks zibhuqe iAll Blacks ngamanqaku alishumi elinesibhozo kwishumi elinesibini (18-12).
By Siphiwo Boqwana