Kubanjwe abarhanelwa abasixhenxe, abaneminyaka ephakathi kwamashumi amabini anesine (24) neminyaka engamashumi amathathu anesithandathu (36) ubudala ngezityholo zokubophelela nokutshisa umnikazi wevenkile, bakugqiba badlwengula umncedisi wakhe ngokuphinda-phindeneyo.
UMnikazi woyisakele ngamanxeba okutsha ngelixa umncedisi wakhe ebalekiselwe esibhedlele emva kokuba edlwengulwe ngabaphangi. Wasweleka umnikazi wevenkile emva kwexesha esesibhedlele. Esi siganeko senzeke kwindawo yolawulo eLuthuli, kwindawo yaseNtilini, kuTsomo, ezinzulwini zobusuku ngoMvulo.
Othethela amapolisa uCaptain Yolisa Mgolodela uthe umnikazi wevenkile nomncedisi wakhe bebelele ngaphakathi evenkileni xa abarhanelwa bephoseleka ngaphakathi.
“Bave ingxolo phezu kwendlu kwangelo xesha elinye, beva amazwi abantu abafuna ukungena ngeknkani emnyango,” utshilo uMgolodela.
Abarhanelwa kutyholwa ngelithi babophelele umnikazi wevenkile oneminyaka engamashumi amane anesihlanu (45) ubudala, bamgalela idizili bamtshisa. Kutyholwa ngelithi baye batshintshiselana bedlwengula umncedisi wevenkile.
Kutyholwa ngelithi kuye kwaphangwa negrosari, umncedisi uye wanyanzelwa ukuba akhuphe i-Pin yoMnxeba weShishini bazoququzelela ukukhuphela imali.
“Abarhunta bathe bokuva amazwi abantu basekuhlaleni, babaleka kwindawo yesiganeko, bathwala ixhoba elingumntu ongusisi ukuya kwindlu ekufitshane,” utshilo uMgolodela.
“Ixhoba liye lahlangulwa, lwabalekiselwa esibhedlele ukuyofumana uhoyo lwezempilo nolwengqondo.”
Umnikazi wevenkile usiwe kwisibhedlele saseGcuwa, nalapho aye woyisakala khona ngamanxeba okutsha.
Abarhanelwa kulindeleke ukuba bavele eNkundleni kaMantyi yaseTsomo xa sele luqukunjelwe uphando lokuqala.
UKomishinala wamapolisa esithili u-Major-General Rudolph Adolph uwacengile ewabongoza amapolisa ukuba aqinisekise ukuba umrhanelwa oshotayo uziswa ngaphambili.
U-Adolph uvakalise ukuxhalaba ngenxa yolwaphulo-mthetho oluqhubekayo kule ndawo, oluquka isiganeko apho kutyholwa ngelithi unyana ubulele uyise ngokumasikizi ngempela veki.