Amakrwika enze ezibukwayo kule mpela veki siphuma kuyo ngomgqibelo umhla wamashumi amabini abesihlanu(25) kuCanzibe ngethuba bephumelela intshinga okokuqala emva kweminyaka emininzi kubalele kubo.
IGriquas ziphumelela lendebe zidlale imidlalo yonke ayabethwa. Eli qela libethe iimbangi zayo iiPumas kumagqibela kankqoyi wendebe iSA Cup. Lo mdlalo ubudlalelwa eKimberley nalapho iiGriquas ziwuqale kakuhle zinkqenkqeza phambili ngamashumi amabini anethoba kwiqanda(29-0) kwimizuzu engamashumi amabini anesihlanu(25) yokuqala. Amakrwika kuthe kusiyiwa ekhefini abe ehamba phambili ngamanqaku angamashumi amabini anethoba kwishumi elinesine(29-14).
IiPeacock Blues zibethe iiPumas ngamanqaku angamashumi amane anesithandathu kumanqaku angamashumi amabini anesine(46-24). Iqela laseMumalanga iiPumas khange ziqheliselwe tuu kwaphela liqela lakwidolophu yeedayimane eKimberley kwiphondo iNorthen Cape nalapho bekudlalelwa khona.
Umdlali onamava uGeorge Whitehead nodlala njengeflyhalf kwiqela leeGriquas uncedise ngeshumi elinethoba(19) lamanqaku kuquka nokulala emgceni kulomdlalo eyedwa. Iqela lePumas belikhe labonisa ukubuya kodwa idonga leeGriquas lema ngxi.
By Siphiwo Boqwana