By Siphiwo Boqwana.
INkqubela phambili, iingxoxo ezikhuthazayo, ulwazi oluphangaleleyo, ukwabelana kwezoshishino, imvisiswano nezinye izinto, ibizizinto ezingundoqo ebeziphambili kumsitho iKomani G20 Awarness RoundTable.
Lo msitho ububanjelwe eQueens Casino eKomani izolo umhla wesithandathu (06) kwinyanga yeThupha 2025.
Lo mcimbi ubaluleke kangaka bekukho oosomashishini abasakhulayo nabaziwayo, iimfundimani, iintatheli zamaphepha-ndaba nabo basebenzela izikhululo zosasazo zasekuhlaleni namasebe karhulumente.
Phakathi kwabo bebekhona singabalula uLuvuyo Rani oyingqonyela yeAfrica Foward nokwangumququzeleli weG20 eAfrika, udokotela Nicky Kunjuzwa ophuma kwidyunivesity iNelson Mandela Bay eGqeberha, uLonwabo Rani ingqonyela yePhanda Mzantsi, kunye noNozipho Chiliza weSebe lezeMfundo kwiCandelo leECD.
Lo msitho ubuququzelelwa yiPhanda Mzansi ibambisene neAfrica Foward, iSU20 nezinye.
Ezinye izitatanyiswa ebezikhona kulomcimbi ibingumphathi wesikhululo sosasazo iVukani FM uXola Nozewu, uZodwa Ngquga ongumqeqeshi kwezoshishino, uMongameli wombutho wabo baphila ngokukhubazeka uThembelihle Ngcayi.
Kule ngqungquthela bekukho nabo bebethabatha inxaxheba bekwamanye amazwe ngeintanethi nalapho singabalula uDanson Gonchini okwilizwe laseSwitzerland, naye ungomnye wabaququzeleli beG20 kule-Africa Forward ikhokelwa unguLuvuyo Rani, ukwa kwiWorld Economic Forum, uKatlego, uMasosha Mnguni, singamlibelanga uVuyani Jarana nobengomnye wezikhulu ebezikhona, u-Ephrame Parafara weSebe lezoBugcisa, uLinda Sibali oyiNjingalwazi kwiDyunivesiti yaseFort Hare noyinzalelwane yaseGqeberha naye ebekhona eKomani buqu, uLubabalo Nontsele weKomani SME Connect uThemba Mngomezulu.
Kugadlelwe kakhulu kulengqugquthela yayizolo nalapho kuye kwenziwa noceyo apho bekujongwa iindlela ezinokuqhubela phambili oku sele kubonakala sele ingumkhonba ndlela wokuya empumelelweni kulento sele iqaliwe, ingakumbi eKomani.
Kulo msitho kugqitywe ekubeni konyulwe ikomiti yabantu nje ababini nabathe babonakalisa ulwamvila kwizinto kakade ekubonakala sele bezenza ngenjongo zokuncedisana noosomashishini abasakhulayo khonukuze kuphele ukuthetha kwenziwe.
Abo babini banikwe uxanduva nguSihlalo uLuvuyo Rani wePhanda Mzansi nobonakele esiza nezisombululo ngethuba lofuthelwano obelumandla kwenye yeeseshoni ebeziqhuba kulomcimbi wayizolo, omnye ibe nguLubabalo Nontsebe weSME Connect onguNobhala nozakuthi abhale ushwankathelo lwalengqungquthela aze azengqo nomkhombandlela oyaphambili nozakunika ncakasana ukuba kuzakwenziwa ntoni ukuqhubela phambili khona ukuze izinto ziphumelele kungabikho nto yenzekayo emva koko kuthi cwaka.
Nanjengoko singasemoyeni siliphepha ndaba iEC Indaba, sizakumane sikuphakela ukubheka phambili khona ukuze ungashiyeki ngasemva sikhona njengomlomo wakho.
Unganyebelezeli akuzukudlalwa kwelityeli, sizakuziphaka ziphuma ngqo e-Ontini.