Imvumi yodumo uMr Vee Sholo uye waphumelela kwiSouth African Traditional Music Awards (SATMAs) 2024, efumana amawonga kwi-Song of the Year kunye ne-Best isiXhosa Artist abonisa ukuzinikela kwakhe kwinkcubeko. Eli gcisa, lendele nzulu kwizithethe zesiXhosa, livakalise umbulelo walo novuyo emva kwala mawonga.
“Ukuphumelela la mawonga kuyandithoba kwaye kuyakhuthaza, bubungqina bokusebenza nzima, ukuzinikela, nothando endinalo ngomsebenzi wam wobugcisa. Kuvakala kungakholeleki ukubona umculo wam, omiliselwe kwinkcubeko nezithethe, ubhiyozelwa ngoluhlobo lukhulu kangaka,” utshilo uMr Vee Sholo.
“Ayisiyiyo impumelelo yam kuphela; yeyawo wonke umntu ondixhasayo, ukusuka kusapho lwam ukuya kubalandeli bam.”
UMr Vee Sholo, onomculo ongumxube wezandi zesintu nezandi zale mihla, uwajonga la mawonga njengobungqina bohambo lwakhe njengegcisa.
“Bayangqina ukuba ukuhlala ndinyanisekile kwiingcambu zam nokusebenzisa umculo ukugcina nokubhiyozela inkcubeko yesiXhosa kuyavakala ebantwini. Mna ngokwam bandikhumbuza apho ndisuka khona noxanduva endinalo lokuqhubeka ndiphakamisa uluntu lwam kwaye ndimele inkcubeko yethu ngokuzingca.”
Ku-Mr Vee Sholo, umculo awuyonto nje yobugcisa kodwa uyibhulorho edibanisa izizukulwana. “Umbono wavela kwintlonipho yam enzulu yesiko kunye nomnqweno wam wokwenza ukuba ifikeleleke kwisizukulwana esincinci. Bendifuna ukwenza umculo ohlonipha abantu abadala ngelixa ndiwuzisa kwelilixa langoku, ndidibanisa izandi zemveli kunye nezinto zanamhlanje ukuze ndiwenze ubelane kwaye wonwabise umntu wonke malunga nokugcina inkcubeko yethu iphila ngendlela eguquguqukayo namaxesha.”
Ukukhulela eMdantsane, ilokishi eyaziwa ngokuba nembali yomculo, uthando lukaSholo lwamagwijo neengoma zesintu lunzulu. “Kudala ndiwathanda amagwijo neengoma zesiNtu kuba zithwele amabali abantu bakuthi, endaweni yokulandela ezinye iindidi ezifana neHouse okanye iHip Hop ndaziva ndinobizo lokuba ndiwaphakamise ngezi ngoma, ndikhumbuze abantu ngeengcambu zabo, ndibanike okuthile abanokuzingca ngayo kwinqanaba lehlabathi. ”
Umsebenzi kaSholo ubangele ukuvuselelwa kwenkcubeko kubantu abatsha. “Ndiye ndabona abantu abatsha besamkela ilifa labo ngokuzingca, becula kunye neengoma ezinokuthi zilibaleke.
USholo uthe impumelelo yakhe kukukwazi ukomelela nokuhlala enyanisekile kumbono wakhe nangona kukho imingeni.
“Iminyaka embalwa edlulileyo izaliswe yimiceli mngeni, ukusuka ekulinganiseni iimfuno zeshishini lomculo ukuya kwindlela yokukhula komntu. Esinye sezona zifundo zinkulu endizifundileyo kukubaluleka kokuqina kunye nokuhlala ndinyanisekile kumbono wam, nangona izinto ziba nzima. .”
Ebhekisa kumagcisa esiXhosa aselula, uSholo udlulisa umyalezo onamandla: “Ungakhe woyike ukwamkelela isiko lakho, liphakamisa kwaye uzise utshintsho oluhle ngalo lonke ixesha, hlala umiliselwe kwinto oyiyo, kwaye umculo wakho mawube yimbonakaliso yohambo lwakho olulodwa.”
Nanjengoko ebhiyozela impumelelo yakhe kwiiSATMA, uMr Vee Sholo uthe gqolo ukuba sisibane seqhayiya lenkcubeko nobugcisa obutsha, ekhuthaza isizukulwana esitsha ukuba samkele kwaye siphakamise ilifa laso.