By Nyameka Lamani
Usomashishini uBrown Mogotsi uzakuqhubeka nephekwa ngemibuzo izolobungqina phambi kwekomishoni kaMadlanga namhlanje,umhla weshumi elinethoba(19)kweyeNkanga ka 2025 ngenjikalanga yentsimbi yesibini(2pm).
Ukulibazise kubangwe kungangqinelani okufunyenwe kwingxelo yakhe ngexesha lenkqubo yangoLwesibini. UMogotsi uzakufumana ithuba lokuthethathethana namagqwetha akhe ukuze ahlole amaxwebhu akwisixa semiboniso yale komishini ekusafuneka ewaphonononge.
Ngethuba enikela ubungqina ngoLwesibini, uMogotsi uye wasokola ukukhumbula iinkcukacha ezibalulekileyo kwingxelo yakhe ebeyilungiselele. Oku kucace ngakumbi xa ebebuzwa malunga nomyalezo awuthumele kumphathiswa wamapolisa uSenzo Mchunu, owawubhekisa kumntu ekutyholwa ukuba wanikwa isivumelwano samashumi amathathu ezigidi zeerandi(R30M) kwiNkonzo yesiPolisa yoMzantsi Afrika (SAPS). Uthe akubuzwa malunga nalo mntu, uMogotsi akakwazanga ukukhumbula iinkcukacha ezibalulekileyo.
Inkokeli yobungqina uAdvocate Matthew Chaskalson ucinezele uMogotsi ukuba acacise, ebuza ngegama laloo mntu. Nangona uMogotsi ekugqibeleni wakhumbula ukuba igama lalo mntu nguJoshias, akazange akwazi ukuyichaza ifani. Ukhankanye ukuba baye banxibelelana kodwa abazange baphele bedibana, kwaye ukungakhumbuli kwakhe kwaphakamisa imibuzo malunga nokuthembeka kobungqina bakhe. Ukuqinisekisa ukuba uyaphinda aqhubeke nobungqina bakhe ngokucokisekileyo nangokuchanekileyo, uMogotsi uzakunikwa ixesha elongezelelweyo ngalentseni ukulungiselela azakuvela ngentsimbi yesibini emini(2pm)