UMphathiswa wezoThutho noKhuseleko loLuntu ephondweni, uXolile Nqatha,
udakumbile kakhulu kukubhubha okoyikekayo kwegosa lendlela eliyinkosazana uBertha Beaulah Van Vuuren Fortuin e-Gqberha ngoMvulo umhla wamashumi amabini anesixhenxe
(27) kuTshazimpunzi.
Oku kusemva kokuba uVan Vuuren Fortuin ephulukene nobomi bakhe kabuhlungu emva kokungqubana kwemoto karhulumente awayeyiqhuba kunye nebhasi ende kwi-N2 eJeffreys Bay.
Kuthiwa uVan Vuuren Fortuin wayebuyela kwisikhululo sakhe emva kokusabela kwindawo yengozi yangaphambili xa kwenzeka ingozi. Wabhengezwa njengoswelekile kwindawo yengozi. Ukanti bonke abakhweli bebhasi basinde bengenzakalanga.
UMphathiswa uNqatha ubona ukusweleka kwakhe okubuhlungu kungekuphela nje njengokulahlekelwa kusapho, kodwa nakwisebe kunye nazo zonke iiarhente zogcino-mthetho kweli phondo.
“Ukusweleka okubuhlungu kukaVan Vuuren Fortuin kukuphazamisa kakhulu imizamo yephondo yokuphucula ukhuseleko ezindleleni nokunciphisa ukubhubha kwabantu kwiphondo lethu. Egameni leSebe lezoThutho, ndingathanda ukudlulisa amazwi ovelwano olusuka entliziyweni kusapho olusentlungwini, abahlobo kunye noogxa begosa elingasekhoyo,” utshilo uMphathiswa uNqatha.
Ityala lokubulala ngokungeyomfuneko livuliwe kwisikhululo samapolisa saseJeffreys Bay ukuze kuphandwe ngakumbi.