Umphathiswa uSenzo Mchunu ukuqinisekisile ukuzinikela kukarhulumente okungagungqiyo ekubuyiseleni umthetho nocwangco kuluntu oluchaphazelekayo.
UMphathiswa wamaPolisa uSenzo Mchunu, udibene noSodolophu womasipala waseOR Tambo uNgqondwana, uluntu, kunye neenkokheli zephondo ngeenjongo zokukhawulelana nokwanda kolwaphulo-mthetho, ubuqhetseba kunye nobundlobongela kulo mmandla. Oku kwenzeke ngomhla weshumi elinesihlanu (15) kweyeThupha 2024.
USodolophu uNgqondwana kulendibano uye wabalula iziganeko ezimanyumnyezi apho izihange zifuna imali yokhuseleko koosomashishini nakubantu abadala, ecaleni kokukhula kweenkxalabo zodushe lwemipu, ubundlobongela obusekelwe kwisini (gender-based violence) (GBV), nezinye iindlela zokuxhatshazwa. Uye wagxininisa imfuneko engxamisekileyo yentsebenziswano eyomeleleyo phakathi kwenkqubo yezobulungisa kunye noluntu ukuze kupheliswe ezi zenzo zikhohlakeleyo.
Inkulumbuso yephondo uLubabalo Oscar Mabuyane naye uvakalise ukuxhalaba kukaSodolophu, ekwabulela ukwanda kolwaphulo-mthetho kwizithili zonke zephondo. Uqinisekise ukuba urhulumente wephondo usebenza ngenkuthalo ekuphuhliseni nasekuphumezeni amacebo asebenzayo okulwa nokuthintela ubugebenga.
Umphathiswa uSenzo Mchunu ukuqinisekisile ukuzinikela kukarhulumente okungagungqiyo ekubuyiseleni umthetho nocwangco kuluntu oluchaphazelekayo. Ukukhawulelana nokukhula kweenkxalabo zolwaphulo-mthetho kwiSithili sase-OR Tambo, iSebe leSizwe liza kuthumela amapolisa ongezelelweyo, iQela lokuPhendula ngoBuchule, kunye neYunithi yezobuNtlola yeSizwe eMthatha. La manyathelo ajolise ekuqinisekiseni ukhuseleko loluntu kunye nokubuyisela umoya wokhuseleko eluntwini.