Usekela mongameli weAfrican Christian Democratic Party (ACDP) uWayne Thring uthi ukurhoxa kukaFloyd Shivambu kwi-Economic Freedom Fighters (EFF) ayothusi.
UShivambu ubhengeze ukurhoxa kwakhe kwi-EFF nakuwo onke amaqumrhu ayo kwakunye nePalamente kwindibano noonondaba eRhawutini ngoLwesine umhla weshimi elinesihlanu (15) kweyeThupha.
Kule ndibano, i-EFF ikwabhengeze ukuba uyarhoxa njengelungu lePalamente uMzwanele Manyi. Bobabini uShivambu kunye noManyi bazibandakanye neqela loMkhonto weSizwe.
UThring uthi bobabini abarhoxayo bebelindelekile. Esithi ke, ayothuswanga iACDP kukurhoxa kukaSekela Mongameli we-EFF kwakunye noMnu Mzwanele Manyi ngenxa yamahum-hum malunga nokungavisisani nongquzulwano phakathi kweenkokeli namanye amalungu e-EFF angonelisekanga yindlela iqela elihamba ngayo.
Kusenjalo kwinkomfa ye-EFF noonondaba, Umbutho woMkhonto Wesizwe (MK) uthi ukuphuma kukaFloyd Shivambu noMzwanele Manyi kwi-Economic Freedom Fighters (EFF) kuzakunceda amaqela aphikisayo ePalamente.