By Nyameka Lamani
UXolile Nqatha umphathiswa wesebe lezothutho eMpuma Koloni kulindeleke ukuba atyelele idolophu yaseNgcobo ngomso umhla wamashumi amabini anesithandathu(26) kweyeNkanga ngenjongo nemeko eqhubekayo yokuvalwa kwedolophu ngonoteksi.
I-Engcobo yidolophu yasezilalini ebekwe ecaleni ko-R61,enye yeendlela ezinkulu ezidibanisa iNtshona Koloni neendawo ezithile zeMpuma Koloni eziquka iKomani noMthatha.Le dolophu ibiphantsi kweliso elibukhali zii-arhente zogcino-mthetho imini yonke.
Izithuthi zonoteksi zipakwe ngasezitalatweni nangaphandle kwedolophu, nanjengoko abaqhubi bevakalisa inkxalabo malunga neebhasi ezihamba umgama omde abathi zisebenza ngaphandle kweemvume ezisemthethweni(valid permits), okanye kwezinye iimeko zophula imiqathango yemvume ekhoyo. Bakhethe omnye wabaqhubi abakhulu kushishino lweebhasi ezihamba umgama omde njengomphembeleli ophambili kwiingxabano eziqhubekayo.
INkulumbuso yephondo leMpuma Koloni uLubabalo Oscar Mabuyane obenothethathethwano ngokusesikweni kule dolophu ebutsheni banamhlanje, uzinike ithuba lokuthetha emamele iinkxalabo zabaqhankqalazi.
Isebe libonise inkxalabo kukuvalwa kwedolophu encinci iNgcobo ngoko ke uMnumzana uNqatha uzakuthethisana ngqo nenkonkheli zecandelo kweteksi ukuva izikhalazo zabo nokuqinisekisa ukuba bonke abaqhubi bezithuthi zika wonke wonke bayayithobela imithetho ukusukela kwibhasi ukuya kwiteksi
UMphathiswa uNqatha ugxininise ukuzinikela ekujonganeni neenkxalabo ezimalunga nemiba yezothutho, eqaqambisa ukubaluleka kweengxoxo nolamlo ukuze kufikelelwe kwisisombululo esisemthethweni. Eyona nto iphambili kukubuyisela ucwangco, ukuqinisekisa ukuthotyelwa kwemigaqo, nokukhusela iindlela zokuphila ezixhomekeke kwinkqubo yezothutho. Isebe lezothutho lisebenzisana namaziko ogcino-mthetho ukuzinzisa le meko. Nangona kunjalo, ukuvalwa okuqhubekayo kuye kwachaphazela kakhulu imisebenzi yezoqoqosho kunye neenkonzo zoluntu edolophini.