Umrhanelwa otyholwa ngokubhatala ababulali imali engange-R11,000 uphakathi kwabane ababanjwe emva kokuba owasetyhini oneminyaka engamashumi amathathu (30) ubudala oxhwilwe KuGompo ekrwitshiwe waze umzimba wakhe watshiswa.
UZovuyo Mbana ulahlekile ngoMgqibelo umhla wamashumi amabini anethoba (29) kweyoKwindla. Usapho nabahlobo baqalise uphando olukhawulezileyo kwiminatha ye-internet yoluntu emva nje kokuba elahlekile.
Ngokwengxelo esasazwe kumaqonga onxibelelwano yosapho lwakhe, indawo yokugqibela kaMbana yayikufutshane neMdantsane eGrinika, indawo edumileyo apho kufunyenwe khona izidumbu ezininzi zabantu abalahlekileyo kule minyaka idlulileyo.
Ngemini yangoLwesithathu umhla wokuqala (1) kuTshazimpunzi, amapolisa aqinisekisile ukubanjwa kunye nokufunyanwa komzimba wexhoba.
“Owasetyhini oneminyaka engamashumi amathathu (30) ubudala oxelwe ukuba ulahlekile ngempelaveki ufunyenwe ebhubhile,” sitshilo isithethi samapolisa uBrig Nobuntu Gantana.
“Umzimba wakhe ufunyenwe ngoMvulo ecaleni komgaqo-N6 kufutshane nelali yaseKwetyana, kufutshane neSixeko saseKuGompo.”
UGantana uthe ngeCawa amapolisa afumene ingxelo yabantu abalahlekileyo malunga noMbana.
Kuthiwa wabonwa okokugqibela ephuma eMalcomess Park eSouthernwood kunye nomntu asebenza naye. “Abaphandi benze udliwanondlebe lokulandelela iintshukumo zokugqibela zexhoba,” utshilo uGantana.
“Uphando olongezelelekileyo lukhokelele ekufumanekeni komzimba wakhe ecaleni komgwaqo u-N6 kufutshane nelali yaseKwetyana. Kuthiwa ixhoba lakrwitshwa emotweni.
“Emva kokubulawa, abarhanelwa abathathu bakhangela indawo ecaleni komgwaqo u-N6 ukuze balahle umzimba.
“Kwindawo yesiganeko, kuthiwa babeke amatayara amadala kumzimba wexhoba baza bawutshisa.
“Izinto zexhoba zalahlwa; iselula enye kamva yafunyanwa kufutshane nomlambo kufutshane nesidumbu eso.”
Ukanti abarhanelwa abathathu, ababini abaneminyaka engamashumi amathathu (30) kunye nomnye oneminyaka engamashumi amane (40) ubudala, batyholwa ngokusesikweni ngokuxhwaila nokubulala.
“Ngexesha lophando, umrhanelwa wesine wachongwa njengoyena mntu utyholwa ngokuba yingqondi eyahlawula abanye ukuba benze ukubulala,” utshilo uGantana.
“Indoda eneminyaka engamashumi amahlanu anesithathu (53) ubudala kamva yazinikela kwisikhululo samapolisa eKuGompo.
“Kuthiwa uvumile ukuba uhlawule abanye abarhanelwa abathathu i-R11,000 — i-R6,000 ngaphambi kokubulala kunye ne-R5,000 emva koko.
Abarhanelwa abane bavele kwinkundla kamantyi eKuGompo City ngoLwesithathu.
Ityala lihlehlisiwe ukuze kufakwe isicelo sebheyile ngokusesikweni.
Uphando lwamapolisa luyaqhubeka.