By Esona Magawana.
Uphando ngokubulawa kwabantu kwiHotele iHighgate ngo-1993, lelinye lamatyala athunyelwe kwi-NPA yiKomishoni yeNyaniso noXolelwaniso (TRC), leihlehliselwe umhla wokuqala (1) kweyoMnga 2025 ukuze ijaji echopheleyo inike iziphumo zayo.
Uphando lwaqala ngomhla wamashumi amabini anesixhenxe (27) KweyoMqungu 2025, lwaqhubeka ukusuka kumhla wamashumi amabini anesine (24) ukuya kumhla wamashumi amabini anesibhozo (28) kweyoKwindla 2025, kwaye laphinda lahlangana ukusuka kwishumi elinanye (11) ukuya kwishumi elinesithathu (13) kweyeThupha 2025, kwaye imiselwe iseshoni yokugqibela ngoMvulo ukuya ngoLwesine.
Abatshutshisi kunye namagqwetha ezi ntsapho benze iingxoxo zabo zokugqibela emva kokuba amangqina angaphaya kumashumi amathathu enike ubungqina phambi kweJaji uDenzil Potgieter kwiNkundla eYodwa, eMonti.
Amangqina aquka igosa eliphandayo eliphuma kooKhetshe, abasindileyo, iintsapho zabangasekhoyo, iingcaphephe zomdlalo webhola ekhatywayo, ababesakuba ngamapolisa, iiNkumanda zomkhosi wenkululeko woluntu iAzanian People’s Liberation Army, abaphandi babucala abachongwe ziintsapho ezichaphazelekayo, kwakunye nomtshutshisi ophezulu.
Inkundla iphinde yenza uhlolo kwindawo yesiganeko.
Olu phando lusukela kwisigqibo soMphathi wezoTshutshiso eMpuma Koloni, uBarry Madolo, sokuba kukhangelwe ukuba ngaba ngubani na onokugwetyelwa ulwaphulo-mthetho ngolu hlaselo.
Ngobusuku bendyhikityha yokufa, ngexesha elinzima elikhokelela kunyulo lwedemokhrasi ka-1994, abahlaseli abaxhobileyo badubula kwiibhari zehotele iHighgate eMonti. Abantu abahlanu, uStanley Hacking, uDouglas William Gates, uRoyce Michael Wheeler, uDeon Wayne Harris, noDeric John Whitfield, babulawa, kwaye abanye abasixhenxe bonzakala kakhulu, befumana ukwenzakala okusisigxina kunye nokukhubazeka.
Abasindileyo abathathu kunye namalungu amabini osapho lwamaxhoba anike ubungqina ngexesha leengxoxo ze-TRC. Akukho zicelo zoxolelo zenziwayo ngabarhanelwa ngabenzi bobubi. Ngelixa uhlaselo ekuqaleni lwalunxulunyaniswa nephiko elixhobileyo lePan Africanist Congress (PAC), uphando olwalandelayo aluzange luqinisekise oku.
I-NPA inethemba lokuba okufunyenweyo kule nkqubo yokuncinwa kuya kubonelela ngokuvalwa okufunekayo kwiintsapho zamaxhoba, amaxhoba, kunye noluntu ngokubanzi.