By Esona Magawana.
UMongameli Cyril Ramaphosa useke wakhalimela ooceba beAfrican National Congress (ANC) ebabongoza ukuba “bafunde” koomasipala abaphantsi kweDemocratic Alliance (DA), athe wavuma ukuba basoloko beqhuba kakuhle kunabo baphantsi kolawulo lweANC.
Ethetha namawaka-waka ooceba beANC kwindibano yokubiza amagama ababhalisayo ebibanjelwe kwiBala iFNB ngoMvulo, womhla weshumi elinesihlanu (15) kweyoMsintsi 2025, uRamaphosa uthe yinyani ebuhlungu into yokuba iingxelo zoMphicothi-zincwadi zisoloko zibeka oomasipala beDA phezulu kulawulo nakunikezelo lweenkonzo.
“Iyandikhathaza into yokuba unyaka nonyaka, iingxelo zoMphicothi-zincwadi Jikelele zibonakalisa iziphumo ezingcono koomasipala abaphantsi kweDA kunabethu. Akumele kube njalo,” utshilo uRamaphosa kwindibano.
Umongameli we-ANC ugxininise ukuba ukwamkela ezona zenzo zilungileyo kwabo bakhuphisana nabo kwezopolitiko ayilophawu lobuthathaka, koko linyathelo eliyimfuneko lokubuyisela intembeko eluntwini.
“Akukho nto imbi ngokhuphiswano, enyanisweni, ukhuphiswano kufuneka lusiqhubele ekubeni senze ngcono.”
Amagqabaza kaRamaphosa atolikwa ngokubanzi njengokuvuma ukungaphumeleli okunzulu koomasipala beANC, apho imiba yolawulo olugwenxa lwemali, ukungathotyelwa kokuthengwa kwempahla, kunye nokucotha kokuhanjiswa kweenkonzo kuthe kwasusa ukuthenjwa kumbutho olawulayo.
Ulumkise ngelithi ngaphandle kokuba kuthathwe amanyathelo angxamisekileyo olungiso, iANC isesichengeni sokuphulukana nomhlaba kunyulo loorhulumente basemakhaya ngo2026.
“Ukuba sithe gqolo ukutyeshela uxanduva lwethu kwaye singakwazi ukusombulula iingxaki ezijongene noluntu lwethu, abantu bazakuyirhoxisa inkxaso yabo kuthi,” walumkisa watsho uRamaphosa.
Umongameli uye wacela ooceba ukuba babeke phambili uxanduva lokuphendula kunye nokusabela eluntwini, kuquka nokulungisa izikhalazo zeenkonzo ezisisiseko kwisithuba seentsuku ezimbini.
“Xa umhlali ephakamisa umba wamanzi, umbane, ukuqokelelwa kwenkunkuma okanye imingxuma endleleni, kufuneka usonjululwe zingaphelanga iintsuku ezimbini, le yindlela esibonisa ngayo abantu bethu ukuba siyabahlonipha kwaye sizimisele ngolawulo,” ubethelele watsho.
Abahlalutyi bezopolitiko bathi amazwi kaRamaphosa abonakalisa inkxalabo ekhulayo ngaphakathi kwiANC yokuba abavoti baya bemanyanisa iDA nolawulo olusebenzayo, logama iANC ibonwa igutyungelwe burhwaphilizo nokungahanjiswa kakuhle kweenkonzo.
Ngelixa abanye ooceba besamkele ikhwelo lokuba kujongwe, abanye bucala bavakalise ukungoneliseki kukuthelekisa uluntu noomasipala abaphantsi kweqela eliphikisayo.
Ukanti, uRamaphosa umile kwelokuba iANC ayinako ukuzibamba.
“Asinakuphinda sizenze ngathi, kufuneka sijamelane nenyaniso.”