By Ziziphozenkosi Kili
INkundla yamatyala eGqeberha igwebe uCharles Welile Miya (61) iminyaka emihlanu ethothoza entolongweni emva kokuba efunyenwe enamatyala alishumi elinesithandathu obuqhophololo ngakumbutho weRhafu yoMzantsi Afrika (SARS).
INkundla yamatyala eGqeberha igwebe uCharles Welile Miya (61) iminyaka emihlanu ethothoza entolongweni emva kokuba efunyenwe enamatyala alishumi elinesithandathu obuqhophololo ngakumbutho weRhafu yoMzantsi Afrika (SARS) ngokwaphula umthetho wolawulo lwerhafu kunye nomthetho iValue-Added Tax Act. UMiya nguye yedwa umnini weZidilex Trading CC, erhweba njenge “Weza Projects”.
Njengokuphela kwelungu kunye nomthengisi olimeleyo elishishini, uMiya, ungenise iimbuyekezo ze-VAT ezibubuxoki kwaSARS ukusuka kwithuba lika-2018 ukuya kutsho ku-2020, ebanga iikhredithi zegalelo ezingachanekanga kwaye efumana imbuyiselo engafanelekanga. Uye watshintsha iinkcukacha zeakhawunti yebhanki yenkampani ngaphandle kokwazisa uSARS waza wangenisa iimbuyekezo ezihlaziyiweyo ngaphandle kokubonelela ngamaxwebhu axhasayo.
Iimbuyekezo ezingeyonyani zangeniswa ngekhompyutha, nto leyo eyenza kube nzima kuSARS ukubhaqa ubuqhophololo. Uphando lwe-SARS ludize ukuba iZidilex Trading CC ifumene imbuyekezo engaphaya kwe-R3.7 yezigidi zeerandi, kodwa ngenyathelo elikhawulezileyo, uSARS ukwazile ukubuyisela ngaphezulu kwe-R2.7 yezigidi, eshiya eyona lahleko ingaphezulu kwesigidi seerandi kwa-SARS.
UMiya ulivumile ityala lobubuqhophololo. Exoxa ngesigwebo esifanelekileyo, iGqwetha loMbuso uRonelle Brink ubalule ukwanda okothusayo kolwaphulo-mthetho olwenziwa ngabamhlophe elizweni, olunempembelelo embi kakhulu kuqoqosho. Kubalulekile ukuba abantu kunye namashishini abeke phambili ukuziphatha okusesikweni kunye nokungafihlisi kwiinkqubo zabo ne-SARS.
UMantyi weNkundla yeNgingqi uLionel Lindoor uvumile, echaza ukuba uMiya, njengomntu ofumana isibonelelo sikarhulumente, “waluma isandla esimtyisayo”.
Noxa nje uMiya enetyala kwaye engumntu oqalayo ukwenza ulwaphulo-mthetho, umantyi uyibethelele imfuneko yokuziphendulela kunye nesigwebo esithintelayo. Esamkela esi sigwebo, uMlawuli wezoTshutshiso eMpuma Koloni, uBarry Madolo, uqhwabele izandla abatshutshisi, amapolisa kunye namaqela ophando angaphakathi kwaSARS ngeenzame zabo ezicokisekileyo nezingadinwayo zokuzisa eli tyala enkundleni. Eli tyala lisebenza njengesikhumbuzo esicacileyo seziphumo zokuxhaphaza i-SARS kunye nokubaluleka kokunyaniseka nokuthobela.
Ulwaphulo-mthetho olumandundu kwezorhwebo lubeka emngciphekweni uzinzo lwezoqoqosho lwelizwe kungoko i-NPA iza kusebenzisa zonke izibonelelo zayo ukuqinisekisa ukuba sithatha inyathelo elibukhali ekubatshutshiseni.
By Ziziphozenkosi Kili