By Esona Magawana
Amapolisa aseRhawutini abambe abantu abalishumi elinantathu (13) malunga nolwaphulo-mthetho ngexesha leNgqungquthela yeeNkokheli zeG20. Oku kubhengezwe kwindibano noonondaba yasemva kwe-G20 ngolwesibini umhla we-25 kweyeNkanga 2025.
Aba babanjiweyo baquka amalungu amabini ombutho wezopolitiko obungundaba-mlonyeni i-Operation Dudula nababotshwe ngenxa yokungena ngaphandle kwemvume kwiziko iNasrec Expo Centre eRhawutini. Kwabanjwa amadoda amane (4)ngokuphanga iifowuni zabathunywa baseVietnam kunye nezinye izinto zabo eSandton.
Ngaphandle kwezo ziganeko, urhulumente waseGauteng uthe le ngqungquthela ibe yimpumelelo engathethekiyo. Ethetha kwindibano noonondaba emva kweG20 eRhawutini ngoLwesibini, uMkomishinala wamaPolisa ephondweni uTommy Mthombeni uthe ukuvalwa kwendlela kunye namanye amaphulo akhokelele ekubanjweni kwabarhanelwa ababefunelwa ezinye izenzo zolwaphulo-mthetho.
“Phambi kwalo msitho ubaluleke kakhulu, iNgqungquthela yeeNkokeli [zeG20], sasibeke isicwangciso sesixeko esikhuselekileyo kwiphondo liphela kwizithili ezihlanu.Bekufuneka siqinisekise ukuba kukho imisebenzi eyenziwayo iveki neveki ukuze kuncitshiswe naluphi na ulwaphulo-mthetho kwiphondo liphela.”