By Lilitha Phenduka.
Ngokwengxelo yeSebe likaRhulumente iphondo leMpuma Kapa linikezele ngezindlu ezikhuselekileyo nokuphucula iimeko zokuhlala kubahlali kwiphondo liphela, UMphathiswa wezokuHlaliswa koLuntu, uSiphokazi Lusithi Mani, unikezele ngeetayitile (Title deeds) ezingamakhulu amabini anamashumi amane anesixhenxe (247) kwiintsapho ezikwilali yaseTambo kumasipala wengingqi i-Enoch Mgijima, nto leyo ephawula umzuzu obalulekileyo wobunini bezindlu nokhuseleko kwabo bazakuxhamla.
ISebe lithi olunikezelo yinxalenye yotyhalo olubanzi lukarhulumente wephondo lokuhlangabezana neemfuno zezindlu nokuphucula uluntu.
INkulumbuso uLubabalo Oscar Mabuyane, kwintetho yakhe yobume bephondo yakutsha nje, uqaqambise ukunikezelwa kwezindlu ezingamakhulu amabini anamashumi amahlanu anesihlalu (255) ngempumelelo kunyaka ophelileyo kwabo bebefudula bengabahlali basezifama eCumakala naseKatberg.
Phakathi kwabo baafumana amakhaya kwakukho ikhaya eliphethwe ngabantwana abasemngciphekweni, eliquka iintsana ezingabantwana abane abaswelekelwa ngabazali, nto leyo ebonisa ukuzinikela kukarhulumente ekuxhaseni abona bantu basesichengeni.
Urhulumente wephondo uyakubethelela ukubaluleka kwezindlu ekwenzeni abantu bakwazi ukwakha ubomi obuzinzileyo.
UMabuyane ukwabhengeze izicwangciso zolwakhiwo lwezindlu kunyaka-mali ka-2025/26, ezimisele ukunikezela ngezindlu ezingamawaka amane anamakhulu alithoba namashumi asixhenxe (4,970) nokuphuhlisa iziza ezinikwa iinkonzo ezingamawaka amane anamakhulu amathathu namashumi amahlanu (4,350) kwiphondo liphela.
Oku kuyinxalenye ye-R4.3 yeebhiliyoni zee randi zotyalo-mali kule minyaka mihlanu izayo, ejolise ekwakhiweni kwamakhaya amatsha anagmawaka angamashumi amabini namawaka asithandathu anamakhulu amane (26,400) kwiMpuma Kapa iphela.
La manyathelo okwakhiwa kwezindlu amele ummandla ophambili ekugxilwe kuwo kurhulumente wephondo, ebonisa iinzame ezihlangeneyo zokujongana nokusilela kwezindlu nokudala uluntu oluzinzileyo.