Bangapha kwewaka(1000) abafundi kunye namaqela asekuhlaleni athe axhamla kwiphulo elihle lezemidlalo, nelenziwe liSebe lezemidlalo; uBugcisa neNkcubeko besebenzisana nenkampani yabucala u(MultiChoice) eMpuma Koloni.
Eliphulo nebeluntsuku mbini belibanjelwe kumhlaba waseGcuwa phantsi koMaspala waseMnquma kwisithili saseTsholomnqa. Uluntu lwaseTsholomnqa nabafundi bazibone sele bewelwa ngumqa esandleni, kuba benikezwa amabala afana nawe hoki, ibhola ekhatywayo,ivoli bhola kunye nebhola yomnyazi.
Olunikezelo lweenkundla zemidlalo kuxhamle nezikolo ezintandathu kwaye kwenziwe nomnhyadala wetumente zemidlalo. Ukanti isebe likhiphe izixhobo ezixabisa ngaphaya kweR872 500 kuMaspala waseAmathole esiya naseBCM.
Sithetha nje iTsholomnqa ibengundaba-mlonyeni njengoko abafundi neeklabhu beqala ukudlala, kwinkundla yabo entsha yemidlalo eyahlukileyo nabayinikezwe ngokusesikweni nguMphathiswa uNonceba Kontsiwe kunye neMultiChoice.
“Siyibulela into yokuba iMultiChoice nayo igxile emaphandleni njengaseTsholomnqa, ukwakha eli ziko likumgangatho ophezulu. Oku kuya kukhuthaza abafundi abaninzi ukuba bathathe inxaxheba kwimisebenzi yezemidlalo, hayi kwesi sikolo kuphela kodwa nakwiiklabhu zasekuhlaleni. Sibongoza uluntu ukuba luyigade le asethi nanjengoko yeyenu,” utshilo uMphathiswa uKontsiwe.
