By Sophumelela Singqotha
Umasipala waseMbhashe uqale iphulo elikhulu lokunceda amafama asekuhlaleni ngokunika imbewu yombona kumaqela angamashumi alithoba (90) aseWillowvale, eDutywa, nase-Elliotdale. Oku kuyinxalenye yesicwangciso sikamasipala sokukhulisa uqoqosho, ukulwa indlala, nokuqinisekisa ukutya okwaneleyo kuluntu.
Unikezelo lwembewu yombona luqale eWillowvale kwiholo le-TRC lwaqhubekeka eDutywa kwi Animal Pound. Abalimi abavela kule mimandla beza kuqokelela imbewu yabo baze baqalise ukutyala. EWillowvale, iiprojekthi ezingama-21 zifumene iingxowa zembewu ezingama-348 inye, ngelixa iiprojekthi zaseDutywa ezingama-56 zifumene iingxowa eziyi-145 inye. E-Elliotdale, iiprojekthi ezili-14 zimiselwe ukufumana imbewu yazo kamva namhlanje, ngeprojekthi nganye ifumana iingxowa ezi-107.
Umbona sesona sityalo siphambili sokutya kulo mmandla kwaye uyinxalenye ebalulekileyo yoqoqosho lwasekuhlaleni. Ukuxhasa amafama, umasipala ufake izigidi ezine zeerandi kule nkqubo yenkxaso yombona ukunceda amafama alime umbona omninzi, afumane ingeniso ephucukileyo, adale namathuba emisebenzi.
Usodolophu weSigqeba uCllr Samkelo Janda uthethe kulo msitho, esithi, “Ndithanda ukuncoma ulutsha ngokukhula umdla walo kwezolimo, nto leyo edlala indima ebalulekileyo kuphuhliso loqoqosho nokhuseleko lokutya. Uqhube wathi, “Ulimo lungundoqo kuqoqosho lwethu kwaye lungundoqo kuphuhliso oluzinzileyo, kuyandikhuthaza ukubona ulutsha luthatha inxaxheba ebonakalayo kweli candelo, njengoko lunamandla okuguqula uluntu nokudala amathuba ezoqoqosho ahlala ixesha elide”.
Isebe lezolimo (Department of Angriculture) lincedise ngokunika iingxowa zombona ezongezelelweyo ezingama-834 ukulungiselela inkqubo. Imbewu yombona ebonelelweyo yomelele kwaye isempilweni, kuquka neendidi ezinevithamini ezongezelelweyo kwaye ziyakwazi ukumelana nezifo.
USihlalo weMbhashe Farmers’ Association, uPhillip Gcinile Qokweni, ubulele umasipala esithi imbewu ibizakuba yindleko enkulu ukuba amafama amaninzi ebezithengela ngokwabo.
Le nkqubo ithembisa ukutshintsha ulimo nokuphucula ubomi kwiilali zaseMbhashe.