By Lilitha Phenduka.
Bamalunga namashumi amahlanu (50) abantu base-Monti abashiyeke bengenamakhaya emva kokuba begxothwe kwiiflethi zaseNorthdene naseLorraine, eBelgravia.
NgoLwesine i-Daily Dispatch idize ukuba, uninzi lwamanina nabantwana bathe balala esitratweni kwaye abanako ukushiya izinto zabo yaye abanayo enye indawo abanokuya kuyo, abanye balala neentsana zabo ngaphandle noxa abanye kufuneke baye kufuna iindawo zokuhlala ezingxamisekileyo kubahlobo nakwiintsapho zabo.
Ubukhulu becala aba bahlali abaphangeli kwaye baphila ngemisebenzi engaqhelekanga logama abanye bengabafundi beedyunivesithi kunye neekholeji.
Ngokokutsho komphathi we-First Class Manor Bed and Breakfast, kude kufuphi nale ndawo, phambi kokuba ezi flethi zithathwe zezi ntsapho, ibisaziwa njengendawo edume ngokushishina ngeziyobisi nabaphambukeli.
Isithethi saseBCM uSamkelo Ngwenya uthe isibetho sokuhluthwa kwezakhiwo ezilahliweyo kumasipala ombaxa zibeka esichengeni ukhuseleko lwabahlali namashishini, kuba ootsotsi abaqhuba imisebenzi yabo basuka kwezinye zezi ndawo zingakhathalelwanga.
Lo gama uceba wale wadi uLorna Hali esithi ucele uncedo kwiintsapho ezisuka kwiindawo zokuhlaliswa koluntu okanye zibekwe kwindawo yethutyana, uNgwenya uthe bajongene namatyala angaphaya kweshumi (10), kunye neziko lamalungelo oluntu elizinze eMonti, elikhuthaza ukuba kuthatyathwe amanyathelo okunciphisa intsinzana yezakhiwo ezilahliweyo, eziphangwayo nezidilikayo kwesi sixeko.
Isithethi sesebe lemisebenzi yoluntu ephondweni uVuyani Nkasayi ungqinile ukuba ezizakhiwo zezesebe.