By Nyameka Lamani
Iphulo lamapolisa libe yimpumelelo kwisithili saseOR Tambo, nto leyo ekhokele ekubanjweni kwamadoda amabini aneminyaka engamashumi amane(40) namashumi amane anesibhozo(48) kuTsolo naseLibode.Oku kwenzeke ngempelaveki phakathi koLwesihlanu,ngomhla wesihlanu kweyoMnga, noMgqibelo wesithandathu.
Ngorhatya lwangoMgqibelo, malunga nentsimbi yethoba ngokuhlwa, amapolisa akuTsolo avale indlela(roadblock) eku-R396 ukuya eNqanqathu (Maclear). Babambe indoda enamashumi amane anesibhozo (48) yaseMatatiele efunyenwe ithutha iingxowa ezingamashumi amabini(20) zentsangu, exabisa malunga neshumi elinesithandathu linambini lamawaka(R162,000) ehamba nge Toyota Quantum ephuma KwaBhaca (Mount Frere) esiya eKapa.
Kwisehlo saphambili sangoLwesihlanu umhla wesihlanu(05) kweyoMnga, amapolisa aseLibode abambe ixhego elineminyaka engamashumi amane (40) lengingqi yaseMamfengwini malunga nentsimbi yethoba ebusuku emva kofunyanwa nompu wohlobo lwe-9mm Norinco ongekho mthethweni oku kwenzeka emva kokuva umkhondo malunga nalo mpu, owawunento yokwenza netyala lokuphanga elalivulwe kwisikhululo samapolisa sase-Ekombe ngoTshazimpuzi ka-2021, KwaZulu-Natal. Bobabini abarhanelwa bazakuvela kwiiNkundla zikaMantyi namhlanje,ngoMvulo wesibhozo kweyoMnga.
UMajor General Norman Modishana, uMkomishinala wesithili saseOR Tambo, uncome iinzame zamapolisa abandakanyekayo kula maphulo. Ugxininise ukuzinikela kwabo ekwenzeni uluntu lwase-OR Tambo lukhuseleke ngakumbi ngeli xesha leeholide zokuphela konyaka, ngokuthi baqinise amalinge abo okulwa ulwaphulo-mthetho.