Iqela leqakamba loMzantsi Afrika iiProteas zamagqiyazana lingene kumagqibela kankqoyi kwiNdebe yeHlabathi yeqakamba yeT20I emva kokubetha iqela lamanina eqakamba laseAustralia ngoothinti abasibhozo (8). Lo mdlalo walamaqela mabini (2) ubudlalwa phezolo umhla weshumi elinesixhenxe (17) ngoLwesine ezintsukwini eDubai.
UNonkululeko Mlaba ube ngumdlali wokuqala weProtea ukuthatha oothinti abali-10 kwiNdebe yeHlabathi yeT20 yabasetyhini.
Ukhokele phambili uAnneke Bosch ngethuba eqhokra amashumi asixhenxe anesine emitsi (74) kwiibhola ajongene nazo ezingamashumi amane anesibhozo (48) ukunceda iqela lakhe ukuya empumelelweni.
UBosch nenkokheli yabadlali beProteas Ladies uLaura Wolvaardt owenze amashumi amane anesibini (42) emitsi ejongene neebhola ezingamashumi amathathu anesixhenxe (37) bahlanganise imitsi elikhulu elinamashumi amathathu anesihlanu (135) bencediswa ngabanye ebadlali.
Lo mdlalo walamagqiyazana amaqela mabini (2) ebedlalela eDubai ngethuba iiProteas zibetha ngoothinti abasibhozo (8) abakhuseli balendebe yehlabathi iAustralia nebijongwe njengezakuyikhusela kube kuko lentshinga yayo.
Kumangenelo wayo iAustralia ladies benze ikhulu elinamashumi amathathu anesine emitsi bephulukana noothinti abahlanu (134/5) waze uMzantsi waphendula ngekhulu elinamashumi amathathu anesihlanu emitsi bephulukana noothinti ababini (135/2).
Amanina eProteas avule kakuhle phambi kokuba uTazmin Brits ongumvuli akhutshwe nguAnnebel Surtherland othathe oothinti ababini ebethwa imitsi engamashumi amabini anesithandathu (2/26). Abadlali ababini uWalvaardt noBosch baye baqinisekisa ukuba benza yonke into ibeluqilima ngethuba besenza amashumi alithoba anesithandathu (96) emitsi.
UAyabonga Khaka uthathe oothinti ababini ebethwa imitsi engamashumi amabini anesine (2/24). UBosch uwenze amashumi amahlanu emitsi ngeebhola ezingamashumi amathathu ananye (31) eebhola ajongene nazo.
UPerry waseAustralia uqhokre imitsi engamashumi amathathu ananye (31).
UKapp waseAustralia uthathe uthinti wamnye ebethwa amashumi amabini anesine (1/24), uMooney weqela iAustralia yena wenze amashumi amane anesine (44) ejongene neebhola ezingamashumi amane anesibini (42).
Namhlanje kuqubisana iWest Indies neNew Zealand kumdlalo wesibini wamandulela kamagqibela kankqoyi.
Amanina oMzantsi azakudlala kumagqibela kankqoyi wendebe yehlabathi yeT20I nelithe laphumelela namhlanje phakathi kweNew Zealand namanina eWest Indies.
Amagqibela kankqoyi wendebe yehlabathi ezakudlalwa ngeCawa umhla wamashumi amabini (20) kwinyanga yeDwarha.