IBafana Bafana ifumene icham loluhlu ngethuba bethelekiswa kwiNdebe yeliZwekazi laseAfrika.
IQela lebhola ekhatywayo loMzantsi Afrika iBafana Bafana ifumene icham ngethuba kuthelekiswa amaqela ebhola ekhatywayo aseAfrika. Le tumente izakube ibanjwa ityeli lamashumi amathathu anesihlanu (35) kunyaka ozayo eMorocco. Letumente yamazwe ebhola ekhatywayo izakuqala ngomhla wamashumi amabini ananye (21) kwinyanga yeKhala kunyaka ozayo iyokuvalwa ngomhla weshumi elinesibhozo (18) kweyomqungu kunyaka ka-2026.
Amaqela amabini (2) kuLuhlu ngalinye akwindawo yokuqala (1) neyesibini (2) azakukwazi ukuzibekela indawo kuletumente.
IBenin iLybia neRwanda ngamaqela afakwe neNigeria, olu luhlu alugqibeki ncam, iBenin iqeqeshwa ngowaye sakuqeqesha iNigeria uGernot Rohr, ukhumbule ukuba kumdlalo wokuzibekela indawo kwindebe yehlabathi, ibethiwe iNigeria yiBenin ngamanqaku amabini kwelinye (2-1).
Ka nanjalo kwelinye icala iNigeria isakhangela umqeqeshi emva kokuba beshiywe ngumqeqeshi wabo uFinidi George. UGeorge ulahle emva kokuba bebethwe yiBenin wazibandakanya neqela laseNigeria iRivers United.
Ngamashumi mane anesibhozo (48) amaqela aseAfrika azakuthi athabathe inxaxheba kuletumente kuluhlu olohlulwe kalishumi elinesibini (12) athe lamaqela afakwa kulo, mane (4) amaqela kuluhlu ngalinye nalapho amabini (2) elokuqala (1) nelesibini (2) azakuthi aye eMorocco kuletumente yelizwekazi laseAfrika ngenyanga yeKhala kunyaka ozayo.
Abahlinzeki iMorocco sele benendawo njengabahlinzeki. Loo nto ithetha ukuba linye iqela elizakwazi ukuzibekela indawo eMorocco phakathi kweLesotho, iGabon neCentral African Republic. Ngamaqela angamashumi amabini anesine (24) azakuthabatha inxaxheba kuletumente.
Oluthelekiso lwamaqela belubanjelwe eRhawutini phezolo umhla wesine (4) kule imiyo inyanga. Iinjinga ezikhuselayo i-Ivory Coast neziphumelele intshinga yazo yesithathu (3) kunyaka ophelileyo ngethuba zibetha iSuper Eagles kumagqibela kankqoyi, zidityaniswe neChad, iSierra Leone neenjinga zika-2012 iZambia.
Lemidlalo izakudlalwa ngenyanga yoMsintsi, eyeDwarha neyeNkanga kulonyaka ka-2024.
Ngokuqinisekileyo ingxaki yona izakubakhona kuba lemidlalo izakufikelela nakwixesha lemidlalo yeligi kumazwe ehlabathi kananjalo nakwimidlalo ye-UEFA Champions League. Amaqela ebhola ekhatywayo azakuxabana nabadlali babo kungenjalo namazwe wabobadlali.
Kuzakuba kokokuqala kwimbali yalendebe yeAfrica Cup of Nations idlalwa ngenyanga yeKhala kunjalo nje izakudlalwa ngomhla wokuzalwa kukaKrestu nangosuku lokuqala xa kuvulwa unyaka.
Kuluhlu A yiTunisia yiMadagascar yiCommores neGambia. Kuze kuluhlu B ibe yiMorocco, yiGabon, yiCentral African Republic neLesotho. Kuluhlu C yiEgypt, yiCape Verde, yiMauritania neBotswana.
Kuluhlu D yiNigeria, yiBenin, yiLybia neRwanda. Kuluhlu E yi-Algeria, yi-Equatorial Guinea, yiTogo neLibaria. Kuluhlu F yiGhana, yiAngola, yiSuden neNiger.
Kuluhlu G yi-Ivory Coast, yiSierra Leone neChad. Kuluhlu H yiDRC, Guinea, yiTanzania ne-Ethopia. Kuluhlu I ibe yiMali, yiMozambique, yiGuinea Bissau ne-Eswatini.
Kuluhlu J yiCameroon, yiKenya, yiNamibia neZimbabwe. Kuluhlu K iSouth Africa, yiCongo, yi-Uganda neSouth Sudan. Kuluhlu L yiSenegal, yiBekina Faso, iMalawi neBurundi.
By Siphiwo Boqwana