By Siphiwo Boqwana.
Iindaba ezithande ukothisa kwibhola ekhatywayo zezokuthengiswa komdlali ebekhokela abadlali kwiKaizer Chiefs, uYusuf Maart. UMaart ngokwengxelo yephephandaba iAfrican Times uthengiselwe iqela lebhola ekhatywayo iSV Ried yaseAustria, oku kwenzeka kule mpela veki siphuma kuyo.
IKaizer Chiefs noYusuf Maart bebene zivumelwano zokuba ashiyeke apha eMzantsi ngethuba iqela leChiefs lindulukela kwilizwe laseNetherlands ukuya kuzilolongela isizini ezayo ka2025/26 nezakuqala kwinyanga ezayo ngomhla wokuqala (01) kweyeThupha 2025, ngendebe iMTN8 Wafa-Wafa. Nangona Amakhosi engekho kule ndebe kodwa yona isizini izakube iyaqala. Kwiveki emva kokuqala kwendebe yokuqala yalesizini kuzakube kuqala imidlalo yokuqala yeBetway Premier League.
UYusuf Maart oneminyaka engamashumi amabini anethoba ubudala (29) nozakube egqiba iminyaka engamashumi amathathu (30) kwiintsuku ezimbalwa ezizayo ulikhokelele ekuphumeleleni indebe yokuqala emva kweminyaka emininzi ingasayazi indebe iChiefs ngethuba efaka inqaku lempumelelo kumdlalo wamagqibela kankqoyi wendebe yeNedbank, kumabala iMoses Mabhida eThekwini ngenyanga kaCanzibe kulo nyaka ka2025.
UYusuf udlale imidlalo engamashumi alithoba anesihlanu (95) kwiKaizer Chiefs oko wathi wazibandakanya neli qela ngonyaka ka2022, esuka kwiSekhukhune United.
Ngokwengxelo yomthombo othembakeleyo iAfrican Times, iqela lebhola ekhatywayo laseNaturena kulindeleke ukuba libhengeze intengiso kaMaart kungentsuku zatywala.