BAKHUTSHWE BENGATHANDANGA ABAHLALI ABANGENE NGONDLELA MNYAMA KWIZINDLU EZINTSHA ZASE -CHICKEN FARM EMONTI
Inkonzo yesipolisa (SAPS) ibambisene nesebe lonyanzeliso mthetho(Law Enforcement) phantsi koMasipala iBuffalo City bakhuphe abahlali abangene ngondlela mnyama eChicken Farm kwa-Ward 13.
Ngokwengxelo yonondaba belijelo, kuvakala ukuba kukhutshwe iimpahla ngaphandle abanye bonakalelwa logama abanye balahlekelwe zizinto zabo ngenxa yokungacengwa kokukutshwa gadalala kwezizindlu.
Abahlali bakhala ngokuba khange bafumane isibhengezo ngelinyathelo lithathwe nguMasipala kwinto abayibiza ngokuba ngebezilungiselele kwangethuba ukujongana nalentlekele. Omnye wabahlali ongafunanga ukukhankanywa ngagama ukuzikhusela uthi bayavuma ukuba bangene ngondlela mnyama kwezizindlu , bebefuna isithebe sengxoxo nabasemagunyeni ngoba kudala belinde ukwakhelwa izindlu, bengena nje kwezizindlu kungenxa yokuba bengathathelwa ngqalelo nakubeni zisakhiwa kwindawo yabo.
Umbutho we-Economic Freedom Fighters uthe wamamela ngonobangela wesisiganeko ukuzama ukuthomalalisa umsindo wabahlali. Othethela umbutho we-EFF kwisixeko se-Buffalo City umnumzana u-Siya Rumbu uthi ungenelelo lwabo kulenyewe kukuzama iindlela ezinokukhawulelana nemeko abahlali abajongene nayo nanjengoko bengenandawo yokufihla intloko kungokunje abanye belahlekelwe kunye nendima yokungena kwabo kwizindlu ezingezozabo.
Ukanti isithethi soMasipala iBuffalo City uSamkelo Ngwenya uphefumle ngelithi, benguMaspala weBCM abakholwa ukuyichaza inkqubo yabo yokukhupha abantu abangene ezindlini ngokungekho mthethweni nanjengoko nabo abahlali bengaxeleli mtu xa benyanzelisa ukungena kwizindlu ezingezizo ezabo.
Ingxelo: Yoliswa Khundulu