Oomasipala baseMpuma Koloni batyala iqumrhu eliphehla umbane kweli u-Eskom imali ebalelwa kwi-R4.7bn ekhwankqisayo.
Oku kungokwempendulo ebhaliweyo evela kuMphathiswa weSebe leNtsebenziswano kuRhulumento neMicimbi yeMveli, uZolile Williams, kwimibuzo yombutho iDemocratic Alliance kwiNdlu yoWiso-mthetho eBhisho. UMphathiswa uphawule ukuba umasipala waseMakana, iGreat Kei kunye neKing Sabata Dalinyebo, banamalungiselelo okuhlawula kwaEskom, athe bayawonga. UWilliams ukwathe, ngekhonsathi noNondyebo wePhondo, i-Cogta ibiququzelela izicelo zooMasipala zokuhlawulela amatyala ngokuhambelana nencwadi yeMFMA ekhutshwe nguNondyebo weSizwe. Uthe ukuza kuthi ga ngoku umasipala waseWalter Sisulu sele encedisiwe kwisicelo sakhe esaphunyezwa nguNondyebo weSizwe.
UMphathiswa uWilliams ukwaqaphele ukuba umasipala waseGqirha Beyers Naude nguye owasungula inkqubo yokufaka izicelo, abanye abafana nomasipala wase-Enoch Mgijima, Inxuba Yethemba, Amathlati neRaymond Mhlaba “bajongwe liPhondo” phambi kokuba bathunyelwe kwiSebe lezeMali likaZwelonke. Umphathiswa we-DA kwisebe le-COGTA, uGqr Vicky Knoetze, uthe ityala likamasipala ku-Eskom liphindaphindeke kabini kule minyaka mibini idlulileyo ukusuka kwi-R2 bn ngo-2021 ukuya kwi-R4.7bn yangoku.
Esithi Abahlali batsala nzima ngenxa yokucinywa kombane okwandisiweyo nokunyanzeliswa kweendlela zokunciphisa umthwalo ngenxa yokungahlawulwa, ukuqhwalela kwamashishini nokutshabalalisa iidolophu ezincinci, ezinye iinkonzo ezingundoqo ingakumbi ezamanzi nogutyulo ziphazamisekile ngenxa yokungabikho kombane. U-Knoetze uthe ukunyuka kwamatyala kukwanegalelo kwimo yezemali ehlayo yoMzantsi Afrika, ekwaziyo ukuphosa ilizwe kubunzima bezoqoqosho. Uthe abona matyala makhulu abanamatyala angaphaya kweentsuku ezingama-90 ngumasipala waseEnoch Mgijima otyala uEskom malunga nebhiliyoni enye yeerandi, umasipala waseWalter Sisulu otyala, iR526 yezigidi zeerandi, logama uInxuba Yethemba ityala iR452 yezigidi kunye noGqirha Beyers Naude, ngetyala eliyiR407 yezigidi.
UKnoetze uthi Ukuba baza kuhlangula iidolophu ezincinci kweli tyala likaEskom, kufuneka kuphunyezwe isicwangciso sokubuyisela umbane kunye neentlawulo zombane.