Umasipala ombaxa waseBuffalo City ubongoza uluntu ukuba lubeke phambili ukhuseleko lwabantwana babo njengokuba iimviwo zikaMatriki ziphela.
Njengokuba kusondela ukuphela kweentsuku zokubhala iimviwo zebanga leshumi, umasipala ombaxa waseBuffalo City ubongoza kabukhali abafundi ukuba bangathathi nxaxheba kwimibhiyozo edume kakubi ebizwa ngokuba yi-Pens Down, nesele isisithethe sasemva kweemviwo kuninzi lwabafundi. Echaza iinkxalabo zokhuseleko kunye neentlekele ezidlulileyo, lo Metro umemelele ukuba abazali babaqwalasele abantwana babo kwabo babagade xa kuphela iimviwo zebanga leshumi.
Intlekele yase-Enyobeni Tavern ka-2022, apho abantwana abaninzi abangaphantsi kweminyaka yokuzonwabisa baye baphulukana nobomi babo, isebenza njengesikhumbuzo esicacileyo sengozi eyayanyaniswa nale mibhiyozo ingalawulekiyo. Umasipala ombaxa ngokubambisana neQela lezoKhuseleko elikhokelwa yiNkonzo yesiPolisa yoMzantsi Afrika (SAPS), liqinise amaphulo okuthintela iziganeko ezilolu hlobo. Oku kubandakanya iipatroli ezisecaleni kolwandle, ukuhlolwa kweendawo ezithengisa utywala, kunye nokuhlolwa kwabantu abaqhuba benxilile kuso sonke isixeko.
“Abazali mababeke iliso elibukhali kubantwana babo kwaye babanqande ekuzibandakanyeni kobu bugatya,” utshilo lo Metro.
Abasemagunyeni babongoze oosomashishini nabantu abafake isandla kule misitho efana neendawo ezithengisa utywala kubantwana abancinci nabantu abadala abathenga utywala egameni lolutsha ukuba bayeke.
Ibhodi ejongene notywala eMpuma Koloni nabanye abathathi-nxaxheba bothulelw’ umnqwazi ngamaphulo okwazisa uluntu ngeenjongo zokunqanda ukusela utywala kwabantwana abaselula. Ukongeza, iifemu zokhuseleko zabucala, iiforam zamapolisa zasekuhlaleni, kunye namaqela agada ubumelwane ahlanganisene ukuze anyanzelise ukhuseleko nentlonipho yemithetho yedolophu.
UMetro ugxininise ukuba ukuthintela ukusela utywala kwabantwana kunye nemibhiyozo yokungakhathali kufuna inzame edibeneyo. “Abafundi kufuneka bathathe uxanduva ngezenzo zabo, ngelixa uluntu ngokubanzi kufuneka lukhuthaze imeko engayikhuthaziyo le misebenzi iyingozi.”
Umasipala waseBuffalo City ubongoze wonke umntu ukuba akhumbule iziphumo ezibeka esichengeni ubomi babo ngenxa yalemisitho, nto leyo ehlala ishiya amanxeba asisigxina kubantu abatsha ababandakanyekayo.