Iphinde yahamba phambili kulemidlalo eluthotho yeT20I yeqakamba i-India ngethuba ibetha iiProteas ngeshumi elinanye lemitsi eCenturion eSupersport Park, ePitoli. Mine imidlalo ekulindeleke ukuba idlalwe ngalamaqela mabini eqakamba, sele kudlalwe imidlalo emithathu nalapho i-Indiya iphumelele imidlalo emibini iiProteas zaphumelela umdlalo wamnye nto leyo ethetha ukuba iqela lase-India linkqenkqeze phambili ngemidlalo emibini komnye (2-1).
NguTilak Varma owonzakalise iiProteas ngethuba eqhokra ikhulu elinesixhenxe (107) encedisa iqela lakhe ukuba lenze amakhulu amabini aneshumi elinethoba lemitsi bephulukana noothinti abathandathu (219/6) kumdlalo obuvutha amadangatye abalandeli bengahlali phantsi.
UMzantsi ubekelwe umnqantsa wemitsi engamakhulu amabini anamashumi amabini (220) ukuba uphumelele kodwa abafana bakaMarkram abakwazanga ukwenza ngokwaneleyo nangona bexhathisile noko kumdlalo obunzima kumacala omabini.
UArshdeep Singh ngomnye osebenzileyo kwiqela lasemzini ukuncedisa kwimpumelelo yabo. Iqela leli iProteas zenze amakhulu amabini anesibhozo ziphulukana noothinti abasixhenxe (208/7). Umdlali okhokela iqela loMzantsi uAiden Markram uphume enamashumi amabini anethoba emitsi, umdlali osebenze ngamandla nobesethubeni lokunceda uMzantsi uphumelele ibe nguJansen owenza imitsi ephucukileyo.
UMarco Jansen oqhokre amashumi amahlanu anesine ukhe wabetha uHardik Pandya we-India amashumi amabini anesithandathu emitsi kwibhola ezintandathu zilandelelana.
La maqela azakudlala umdlalo wokugqibela namhlanje ngentsimbi yesihlanu (17h00) emva kwemini ngoLwesihlanu umhla weshumi elinesihlanu (15) kule yeNkanga inyanga.