By Asemahle Mbete.
IDyunivesithi yaseKapa (UCT) ithe ukutshintshwa ngokutsha kweholo elisembindini kubonisa ukuzibophelela kweziko kubulungisa, ukukhumbula, kunye nolungiso.
Kumsitho osemthethweni wokuthiywa ngokutsha iholo ngoLwesithathu, umhla weshumi (10) kweyoMsintsi 2025, idyunivesithi iqaqambise ukubaluleka kokuthiya ngokutsha iholo eyayisakuba yiJameson Memorial Hall ukuze ibe yiSarah Baartman Hall.
Ngo-2018, ibhunga lase-UCT laqalisa inkqubo yokutshintsha amagama, kodwa kwahlangatyezwana nemingeni emininzi, kuquka nobhubhane we-COVID-19.
Eli ziko lithe umsitho wokutshintshwa kwegama usebenza njengesikhumbuzo kubantu ukuba bajongane nokungabikho kokusesikweni ngokunyaniseka nangenkalipho.
“Oku kuthiywa ngokutsha akwenzi nje umfuziselo, kubonakalisa ukhetho lwethu ngokuhlangeneyo ekuqulunqeni amabali kunye nokwala ukulibala iimbali zoluntu oluhlelelekileyo. Idyunivesiti ijonge ukuseka uluntu olusekelwe kubulungisa, inkumbulo kunye nobandakanyo,” itshilo ungqonyela yale dyunivesithi, uGqirha Precious Moloi-Motsepe.
Usekela-ngqonyela uNjingalwazi Elelwani Ramugondo uthe umsitho uqaqambise imixholo yembuyekezo kunye nokuqondwa.
“Ukuthiywa kweholo ngeSarah Baartman kukubhiyozela ubomi bakhe njengowasetyhini womthonyama kwaye njengesikhumbuzo esinamandla somonakalo obangelwe ziimpawu zobuhlanga eYurophu ngenkulungwane yeshumi elinethoba (19).”