Ixakekile iGalaxy ityikitya abadlali ukulungiselela isizini ezayo.
IQela leTS Galaxy lizeke mzekweni kumalungiselelo esizini ezakuqala kulenyanga izayo njengamanye amaqela athande ukuba manxadanxada ekhulula abadlali kwelinye icala kusamkelwa abadlali abatsha.
Basixhenxe (07) abadlali esele bekhululwe leliqela IiRockets kunjalo nje sele betyikitye abadlali abatsha abathathu (3) ukuza kuthi gaa ngoku.
IiRockets ziyaqalisa ukuzilolongela isizini ezayo ngeCawa umhla wesixhenxe (07) kule imiyo inyanga. ULindokuhle Mbatha, uBernard Parker noVuyo Mere bakhululwe leliqela emva kokusokola ukufumana ukudlala kwisizini edlulileyo.
ULehlohonolo Mojela odlala njengefolosi uzibandakanye neqela laseNtshona Koloni iStenbosch FC, uOrebotse Mongae odlala ecabangeni naye ukhululwe leliqela, umdlali waseBrazil uHigor Vidal naye ulishiyile iqela leeRockets noVasilije Kolak obelilalela njengonozinti kobedlala oko uFiacre Ntwari umkile naye kutsho oko ebelisekela lakhe.
IGalaxy ityikitye isivumelwalo nefolosi esuka kwiqela Amazulu uVictor Letsoalo naye wasokola mpela kweliqela laKwaZulu Natala, uVictor ufake amanqaku amathathu (3) kuphela kwisizini edlulileyo kwimidlalo engamashumi amabini anesibini (22) ayidlalileyo.
USiphesihle Maduna odlala esiswini naye ulotyolwe kweliqela esuka kwapha emdubane. Ukhona omnye umdlali ozilolonga neliqela nosuka eKapa yena kwiCape Town Spurs, uneminyaka engamashumi amabini anesine (24) ubudala, wayesakudlalela iqela leHighlands Park ungumgcini zipali usazilolonga neliqela kodwa abakamtyikityi basamjonga uZama Dlamini.
USead Ramovic ongumqeqeqshi weGalaxy kulindeleke ukuba abuyele kweliqela emva kweholide kwiiveki ezimbalwa ezizayo.
Kungenzeka uQobolwakhe Sibanda naye athathwe ziiRockets, yena udlalela iStellis. Kulindeleke ukuba kutyikitywe leliqela nabanye abadlali phambi kokuba kuqale isizini entsha.
By Siphiwo Boqwana