Kuyiwa kumjikelo wesine kulempelaveki siya kuyo kwiCurry Cup.
Umjikelo wesithathu weCurry Cup sibone iBoland iqhubeka nokuphumelela emva kokuphumelela umdlalo wesithathu (3) ngokulandelelana.
Ibiqala ukudlalela ekhaya iBoland ngethuba ibetha iSouth Western Districts Eagles ngamanqaku angamashumi amane anesithathu kwisixhenxe samanqaku (43-7) kwisigaba sokuqala, lomdlalo ubudlalelwa eCeres ngoMgqibelo umhla wamashumi amabini anethoba (29) kweyeSilimela ukutsho oko kwinyanga ephelileyo. IBoland ibihamba phambili kwisiqingatha sokuqala somdlalo ngamanqaku angamashumi amabini nanye kwisixhenxe (21-7).
IBoland ilale emgceni amatyeli asixhenxe yona iSWD ilale kwakanye emgceni. IiFalcons zikwindawo yesibini neeLeopards.
IFalcons zibhuqe iBorder Bulldogs ngamanqaku angamashumi amahlanu anethoba kwishumi elinesibini (59-12) kumabala iBarnard eKempton Park, iScarlet Jerseys bezinqenqeza phambili kwesokuqala isiqingatha ngeshumi elinesixhenxe kwishumi elinesibini (17-12) samanqaku.
Ilale emgceni izihlandlo ezilithoba (9) iFalcons, yona iBorder yalala emgceni kabini (2). Yona iEastern Province ibethelwe kowayo eTinarha nesele isaziwa njengeKariega ibethwa yiLeopards ngamanqaku angamashumi amathathu nanye kumashumi amabini anesithandathu (31-26) ngethuba kusiyiwa ekhefini iLeopards ibihamba phambili ngamanqaku alishumi elinesibhozo kwishumi elinesibini (18-12).
IBoland ikwindawo yokuqala ngoku ngeshumi elinesihlanu (15) lamanqaku, ilandelwe yiFalcons ngeshumi elinanye (11) lamanqaku ibe ilingana neqela leLeopards.
Kulandela iEP kulamaqela mathathu (3) asekuqaleni iBoland, iFalcons neLeopards. I-EP yona inamanqaku asibhozo (8), ibe yiSWD enamanqaku amahlanu (5), kuze iBorder ngamanqaku amabini (2).
Imidlalo elandelayo kulempela veki siya kuyo iSouth Western District Eagles yamkela iFalcons, ze zona iBorder Bulldogs ziqubisane kwidabi neEastern Province, iBoland izakube ihlinzeke iLeopards.
By Siphiwo Boqwana