By Sophumelela Singqotha
Indoda enamashumi amabini anesithoba ubudala igwetywe ubomi entolongweni ngokubulala ngesihlungu indoda eneminyaka engamashumi asixhenxe anesine ubudala eWillowvale, eMpuma Koloni, iqinisekisile i National Prosecuting Authority (NPA).
INkundla yengingqi yaseWillowvale imfumene u-Aviwe Dambile enetyala lokubulala, okusukela kwingxabano yokusasazwa kotywala besintu ngethuba lomsitho wabahlali kwilali yaseMadlutshana, kwingingqi yaseNgadla.
Esi siganeko senzeka nge-28 kweyeSilimela ngo-2024.
“Kwiiveki ezimbini phambi kwesi sigemegeme, uDambile nomfi bebezimase umsitho wokufudumeza umzi apho bekuselwa utywala besintu,” utshilo othethela iNPA kwingingqi uLuxolo Tyali.
“Ebudeni balo msitho uDambile wakhaba ibhekile yotywala ebibekelwe amaxhego, ekhalazela ukuba abafana abafumana iimfabelo ezincinci kuneenkonde zabo”.
Wagxothwa kulo msitho kwaye kuthiwa wagrogrisa ixhego gokuziphindezela.
Ngobusuku bokubulawa, intombi kamfi, esebenza eKapa, imemele amalungu osapho kwikhaya layo ukuze bafumane isiselo.
Ngelixesha ixhego nomhlobo wakhe beyonwabele ibranti, wafika uDambile ephinda izoyikiso zakhe. Emva kokuchithakala kwendibano, uDambile walandela umfi nomhlobo wakhe.
Ngokwenkundla, umzukulwana kamfi, owaba lingqina eliphambili lombuso, uve utatomkhulu wakhe ekhala ecela uncedo. Esebenzisa itotshi yeselula, ingqina lafumana uDambile ebetha le ndoda ngentonga, eyathi ekugqibeleni yophuka, phambi kokuba uDambile akhuphe imela amhlabe izihlandlo ezininzi.
Lithe xa ingqina lizama ukungenelela uDambile wasondela ngakuye, emnyanzele ukuba abaleke. UDambile kuthiwa wabuya waxelela usapho ukuba “usifezile isithembiso sakhe.”
“Xa bebuzwa ukuba uphi lo mzimba, wabakhomba ematyholweni akufuphi, nalapho bafike umzimba kamfi ugqunywe ngebhatyi yakhe,” utshilo uTyali.
Wabanjwa ngosuku olulandelayo, ebonakala engakhathali yaye eqhubeka nemisebenzi yakhe yemihla ngemihla.
Ngexesha lokuchotshelwa kwetyala, uDambile walivuma ityala kodwa wathi wayezikhusela, evuma ukuba “uye wagqitha kwimida yokuzikhusela.”
Umtshutshisi uYandisa Mhaga uyikhabile le ngcaciso, enikezela ngobungqina bengqina lombuso kunye nengxelo yovavanyo lomzimba, edize ukophuka kokhakhayi namanxeba angamashumi amabini ananye.
I-NPA isamkele isigwebo sobomi, iqaqambisa ukubaluleka kwaso ekukhuseleni amalungu oluntu abuthathaka.
“Amatyala alolu hlobo aqinisekisa ukuzinikela kwe-NPA ekuqinisekiseni ubulungisa nokususa aboni abayingozi ekuhlaleni,” utshilo uTyali.