By Asipile Kitchen.
INkundla ePhakamileyo yoMzantsi Afrika, kwiCandelo leMpuma Koloni, eBhisho, imgwebe udilika-jele uBulelani Mbulawa, oneminyaka engamashumi amane ananye (41) ngokudlwengula ixhegwazana elineminyaka engamashumi amathandathu anesibhozo (68).
INkundla ePhakamileyo yoMzantsi Afrika, kwiCandelo leMpuma Koloni, eBhisho, imgwebe udilika-jele uBulelani Mbulawa, oneminyaka engamashumi amane ananye (41) ngokudlwengula ixhegwazana elineminyaka engamashumi amathandathu anesibhozo (68). INkundla yaphinda yamgweba iminyaka elishumi eyongezelelekileyo ngokuqhekeza indlu ngeenjongo zokudlwengula nokuzama ukubulala, kunye neminyaka elishumi elinesihlanu (15) ngokuphanga esebenzisa iimeko ezimanyumnyezi.
La matyala enziwa kwikhaya lexhoba kwindawo yaseMahlubini ngaseNgqushwa ngomhla wamashumi amabini ananye (21) kweyeDwarha ngo2022.
Eli xhegwazana lidla umhlala-phantsi lalikwindawo elihlala kuyo lodwa ebusuku xa ucango lwakhe lukhatywa, luvuleka. Wathi akungena umrhanelwa, wafuna imali, wabetha ixhoba, walikrwitsha waza walifuthanisela ngelaphu lesofa ngaphambi kokuba alidlwengule. Ixhoba laye lakwazi ukuchonga umhlaseli ukuba nguMbulawa kuba bahlala kwindawo enye kwaye bazizalamane ezikude.
Iqela lamapolisa lasebenzela ukuba limbambe njengoko wayebaleka ukubanjwa. UMbulawa waabanjwa emva kweenyanga ezintathu ebaleka.
Ebudeni betyala uMbulawa akazange alivume ityala, ekhanyela ukuba wakha walubeka unyawo lwakhe kwikhaya lommangali nanjengoko wayenxilile. IGqwetha loMbuso uMelumzi Gula uthe thaca ubungqina babantu abadala kunye nexhoba elikhubazekileyo, obulungiswe ligosa lenkundla yamalungiselelo (CPO), uSandiswa Moyake.
Iziphumo zeDNA ezidibanisa uMbulawa, kwakunye nobungqina bengxelo yokuqala, nazo zithiwe thaca ngurhulumente, nto leyo ekhokelele ekugwetyweni. Ngesigwebo u-Adv. Gula uthandazele esona sigwebo sisezantsi sobomi njengoko ixhoba lingumntu omdala kwaye wangenisa ingxelo yempembelelo yexhoba njengoko ilungiselelwe yiCPO.
INPA ithe ihleli iqinile ekulweni ubundlobongela obusekelwe kwisini kunye nokuqinisekisa ubulungisa kwabona bantu babuthathaka eluntwini.
La matyala abonelela ngobulungisa obuthile kunye nokuvalwa kumaxhoba kunye neentsapho zawo kwaye asuse abophuli-mthetho abanobundlobongela ezitalatweni.