Iphelile into ibithethwa kwelaseNgilane kwibhola ekhatywayo, oku kwenzeka emva kokuba kudlalwe umdlalo wokugqibela ngamaqela angamashumi amabini (20) kulo nyaka webhola ka2023/2024.
Ibiyimidlalo elishumi (10) yokugqibela emva kokuba bekugqityezelwa umdlalo wokuvala kweEPL, ukutsho oko English Premier League.
Izolo umhla weshumi elinethoba (19) iManchester City iyikhusele kwakuko intshinga yayo emva kokubetha iWest Ham United ngamanqaku amathathu kwelinye (3-1). IiCitizens zibe liqela lokuqala ukuphumelela iEPL izihlandlo ezine zilandelelana.
IArsenal iye yafa namthanyana nangona iwuphumelele umdlalo wokugqibela ngethuba izibethela iEverton ngamanqaku amabini kwelinye (2-1), intshinga ifana nentlaka exuthwe emlonyeni kuyo ioEverton.
ILiverpool United yona emva kokuba iye yoyiswa kukulwela intshinga iye yaqinisekisa ukuba iyahlala kwindawo yesithathu (3), ngethuba ibetha iiWolves ngamabini amanqaku eqandeni (2-0). Kwelinye icala iManchester United nangona kulonyaka webhola izinto bezingemdaka-ngqikwa kuyo, baye baqinisekisa ngokuvala kakuhle isizini ngokuphumelela ngamanqaku amabini eqandeni (2-0) ekuhambeni, ngethuba bebetha iBrighton kowayo.
NeeBlues zivale kakuhle nangona bekunzima kuzo oko iqalile isizini kodwa baye benza kakuhle kwimidlalo yokugqibela phambi kokuba kuphele isizini kodwa kwabe sele ixesha lixhatshwe yinja. IChelsea ibethe iBournemouth ngamanqaku amabini kwelinye (2-1).
Ezinye iziphumo zeEPL, iFullham ibethele kowayo iLuton Town ngamanqaku amane kwamabini (4-2), iNottingham Forest yazibethela iBurnley kowayo ngamanqaku amabini kwelinye (2-1).
ITottenham Hotspurs ibhaxabule iSherfield United ngamanqaku amathathu eqandeni (3-0) iyibethela kowayo, iAston Villa yona iyokubethelwa ekuhambeni ngempama kwanzima nokuphendula nangocikicane (5-0), ibethwa yiCrystal Palace nenyuse umgangatho phambi kokuba kuphele isizini.
By Siphiwo Boqwana