ISebe leMfundo esiSiseko lithi iimviwo zokuphela konyaka ka-2023 zebanga leshumi ziqale kakuhle izolo. Bangaphezu kwama-700 000 abafundi abahlalele iimviwo zabo zokuqala, isiNgesi iphepha lokuqala, kwilizwe liphela.
Isithethi seli Sebe uElijah Mhlanga uthi basalindele ingxelo yokugqibela malunga nokuba uviwo luhambe njani kuwo onke amaphondo kodwa okwangoku akukabikho ziganeko zixeliweyo.
“Izinto zihambe kakuhle, ngokususela kwiminxeba yokuqala ebesiyifowunele kumaphondo sijonga imisebenzi yosuku. Silindele iingxelo ezibhaliweyo eziza kuza emva kwemini ngale njikalanga kodwa zintle kakhulu.”
Uthi, “Emva kwesiganeko sika-2020 sokuvuza kwephepha lemibuzo ngo-2021, sakwazi ukuwakhusela onke amaphepha; ngo-2022, senza okufanayo. Kodwa asikhathali, siye saqhubeka nokubeka amanyathelo angakumbi okuqinisekisa ukuba ngeli xesha akwenzeki. Sikholelwa ukuba oko sikwenzileyo kuya kusinceda, kwaye sithandazela ukuba izinto zihambe ngokwesicwangciso.