ISebe lezeNgqesho nezaBasebenzi kutshanje liye labamba uthotho lweeseshoni zoMqeshi we-UI kwilizwe lonke ngenjongo yokufundisa nokwazisa abaqeshi ngeNgxowa-mali ye-Inshurensi yabaNgaphangeliyo (UIF). Enye iseshoni enjalo ibibanjwe kuMasipala waseRaymond Mhlaba, kwiHolo yoluntu yaseFort Beaufort.
Le seshoni ibizinyaswe luluhlu olubanzi lwabaqeshi abavela kumashishini namacandelo ahlukeneyo, bonke befuna ukuqonda ngcono i-UIF kunye neemfuno zayo. Le seshoni ibiquka imixholo emininzi, kuquka ukuba yintoni na i-UIF, indlela esebenza ngayo, kunye nendlela abaqeshi abanokubhalisa ngayo baze bafake isandla kule ngxowa-mali.
Enye yeenjongo eziphambili zale seshoni kukufundisa abaqeshi ngokubaluleka kokuthobela imigaqo ye-UIF. Ukanti Ukungathobeli kusenokuphumela kwizohlwayo eziqatha, kuquka izohlwayo ezinkulu kwanokuvalelwa entolongweni. Le seshoni igxininise ukuba ingxowa-mali ye-UIF ayiloncedo nje kubasebenzi, kodwa ikwasisixhobo esibalulekileyo kubaqeshi noqoqosho ngokubanzi.
Kusenjalo I-UIF ibonelela ngenkxaso kubasebenzi abaphulukene nemisebenzi yabo, abonzakele, okanye abathi bagule. Olu Luhlobo olusisinyanzelo lwe-inshurensi kubo bonke abasebenzi abasebenza ngaphezu kweeyure ezingama-24 ngenyanga. Abaqeshi kufuneka babhalise kwi-UIF baze batsale ipesenti encinane yemivuzo yabasebenzi babo nyanga nganye njengeminikelo kwingxowa-mali.
Iseshoni ibiquka izihloko ezahlukeneyo ezifana nezi:
• UkuThobela i-UIF kunye noPhicotho-zincwadi loMqeshi, olunikezelwa nguMnu. Siphamandla Gumede, uMlawuli weSebe leMisebenzi yokuThobela iShishini.
• I-UIF: I-LAP, inikezelwa nguNksz Nozi Tetyana-Tunzi, uMlawuli weSebe kwiNkqubo yokuVuselelwa kwezaBasebenzi.
• INgxowa-mali yeMbuyekezo, inikezelwe nguMnu Thamsanqa Mgudane, iNgxowa-mali yeMbuyekezo ye-ASD.
• Iinkonzo zoHlolo noNyanzeliso, ezinikezelwa nguMnu Luyanda Kwatsha, iingcali kwiMpilo noKhuseleko eMsebenzini.
• IiNdlela zoRhwaphilizo kwiiNkonzo zoLuntu, ezithiwe thaca nguMnu Simiselo Nduli, uMlawuli weSebe loLawulo loMngcipheko neMfezeko.
• Iinkonzo zeNgqesho yoLuntu, enikezelwa nguMnu Trevor Ramnwana, uMlawuli weSebe, iiNkonzo zeNgqesho yoLuntu.
Iseshoni yabaqeshi be-UIF kuMasipala waseRaymond Mhlaba ibe lithuba elixabisekileyo lokuba abaqeshi bafunde nge-UIF neenzuzo zayo nokuqinisekisa ukuba bayayithobela imimiselo. Sisixhobo esibalulekileyo kubo bobabini abaqeshwa kunye nabaqeshi kwaye yinxalenye ebalulekileyo yenkqubo yokhuseleko loluntu yelizwe.