By Nyameka Lamani.
Ngomhla wamashumi amathathu ananye (31) kweyeKhala ka-2025, uMasipala weSithili saseAmathole (ADM) ebambisene namaqela achaphazelekayo aquka uMphicothi-zincwadi Jikelele woMzantsi Afrika (AGSA) kunye neArhente yoKhuseleko lweNtlalo yoMzantsi Afrika (SASSA), baqinise kwiinzame zabo eziqhubekayo zokunceda iintsapho nabafundi abachatshazelwe ziintlekele zempuphuma kuMasipala waseMnquma kutsha nje.
Eli nyathelo lentsebenziswano ligxininisa ukuzinikela okumanyeneyo ekunikezeleni ngenkxaso ebalulekileyo nokukhuthaza ukomelela kuluntu oluchaphazelekileyo.
Olu suku lwaqala ngeseshoni ebanzi yokunika amagqabantshintshi eyayichaza indlela yokusasazwa kwezinto zoncedo eziyimfuneko kwimizi engamashumi amathathu (30) echongiweyo nakubafundi besikolo abalithoba (9).
Ubonelelo olugcinwe ngononophelo luquka izinto eziyimfuneko zekhaya ezifana nezitovu, iitafile ezisongekayo kunye neebhafu zeplastiki ezimbhoxo, ecaleni kweeVawutsha ezingamakhulu amabini anamashumi amabini anesixhenxe (227) zoNcedo lweNtlalo (SRD).
Ukongeza, iiyunifomu zesikolo ezingamashumi mahlanu anesihlanu (55) zasasazwa phakathi kwabafundi beSikolo samaBanga aPhantsi iDavies, Art Angel, iSikolo samaBanga aPhantsi iCaley, neSikolo samaBanga aPhezulu iButteworth, nezihlangu zesikolo ezithe zanikwa abantwana abalithoba (9) ukuxhasa iimfuno zabo zemfundo.
UNkosazana. Vatiswa Nthoesane, iNtloko yokuSebenza ngoLuntu (Head of People Operations) ophuma kwiOfisi yoPhicothi-zincwadi Jikelele yaseMzantsi Afrika (AGSA), ugxininise ukubaluleka kwezenzo ezihlangeneyo, esithi, “Ukubandakanyeka kwethu kubonisa ukuzinikela ekutshintsheni inkcubeko yeCandelo likaRhulumente ngokukhuthaza intsebenziswano kunye nokwandisa inkxaso apho ifuneka kakhulu”, amazwi akhe abonisa amandla eenzame ezihlangeneyo ekujonganeni nemingeni yoluntu.
UMnumzana. Thembinkosi Nxawe, iNtloko yoLawulo lweNtlekele kuMasipala weSithili saseAmathole (ADM), uvakalise umbulelo ongazenzisiyo ngesisa samasebe samacandelo kunye nabathathi-nxaxheba babucala, eqaphela ukuba igalelo labo libalulekile ekulweni nentlekele.
“Oku kukuzibophelela okuqhubekayo,” utshilo uNxawe.
“Sifuna ukuqinisekisa uluntu olusalinde uncedo ukuba abalityalwanga. Injongo yethu kukufikelela kuwo onke amakhaya achaphazelekayo ngenkxaso enentsingiselo.”
Lo mzekelo woncedo wabathathi-nxaxheba abaninzi uyaqhubeka nokuzisa ithemba elibambekayo kunye noncedo olubambekayo kuluntu lwaseMnquma oluthwaxwe yintlekele, lubonisa ukomelela kwentsebenziswano ekwakheni ngokutsha ubomi babantu phantsi kobunzima.