By Siphiwo Boqwana
IQela leSizwe leQakamba loMzantsi Afrika i-Proteas zikhutshelwe ngaphandle kuphiswano lamaZwe amathathu (3) aquka ne-New Zealand nePakistan ngethuba bebethwa liqela lesizwe leqakamba lasePakistan kukhuphiswano olubizwa njenge-Tri Nations. UMzantsi Afrika ubethwe yiPakistan ngoothinti abathandathu (6) kumabala i-National Bank eKarachi kumdlalo wesibini (2) wolukhuphiswano nobudlalwa izolo, umhla weshumi elinesibini (12) kule imiyo inyanga kwelasePakistan.
Iqela leProteas liphumelele i-Toss laze lagqiba ukuba lizakuqhokra kuqala, inkokheli yabadlali beProteas uThemba Bavuma no-Tony de Zorzi benze amashumi amahlanu ananye (51) bedibene phambi kokuba i-Bowler yePakistan uShaeen Shah Afridi ayichithe loombeko ngokukhupha ude Zorzi enamashumi amabini anesibini (22) emitsi egameni lakhe.
UBavuma uqhubekekile ngethuba inguye noMathew Breetzke besenza ikhulu elineshumi elinethoba (119) bedibene, umdlali ngamnye wenze amakhulu amahlanu (50) emitsi.
Basebenze nyhani abadlali basePakistan ngethuba bekhupha uThemba nobevutha amalangatye, uBavuma ukhutshwe ngu-Saud Shakeel enamashumi asibhozo anesibini (82), kanti yena uBreetzke nowenze ikhulu elinamashumi amahlanu (150) kumdlalo wakhe wokuqala uye waqhubeka ngethuba eqhoka no-Heinrich Klaasen.
UBreetzke ukhutshwe enamashumi asibhozo anesithathu (83) emitsi ekhutshwa yibhola ebanjwe ngu-Salman Ali Agha eshiye benze amashumi amathandathu anesibhozo (68) emitsi bedibene no-Klaasen.
UKlaasen uye waqhoka no-Kyle Verreynne nalapho enze amashumi asibhozo anesixhenxe (87) kwiibhola nje ezingamashumi amahlanu anesithandathu (56) ajongene nazo, mitsi leyo incede iiProteas ukuyaku fikelela kumakhulu amathathu (300).
Uqhubile uKyle eno-Korbin Bosch nalapho uKyle enze amashumi amane anesine (44) emitsi ngelixa uBosch eqhoke ishumi elinesihlanu lemitsi (15) nto leyo ebeke amanqaku oMzantsi kumakhulu amathathu anamashumi amahlanu anesibini bephulukana noothinti abahlanu (352/5) kwimijikelo engamashumi amahlanu (50).
IPakistan ikwazile ukuleqa de yafumana impumelelo.
Bawaqwabazile amarekhodi abadlali beqakamba lasePakistan ngethuba beleqa umnqantsa wemitsi emininzi ebekwe liqela le-Proteas, uAgha noRizwan bawophulile amarekhodi ngethuba besenza imitsi engaphuzulu kwekhulu (100) umdlali ngamnye. USalman Agha wenze ikhulu elinamashumi amathathu anesine (134) emitsi ejongene neebhola ezilikhulu elinesithathu (103).
Yena uMohammad Rizwan uqhoke imitsi elikhulu elinamashumi amabini anesibini (122) ejongene neebhola ezilikhulu elinamashumi amabini anesibhozo (128). UMzantsi Afrika ubethwe yomibini (2) imidlalo yayo kuletumente.
Kungoku nje iPakistan izakuqubisana ne-New Zealand kumagqibela kankqoyi waleNdebe yeTri-Nations ngoLwesihlanu umhla weshumi elinesine (14) kulenyanga yothando ngosuku lothando ukutsho oko ngomso kwakwelibala belidlalela iiProteas.